भांगरभूंय | प्रतिनिधी
अामच्या देशांत, जावं विदेशांत तोपीमास्तरांचो उणाव ना. तांचे कडल्यान फटवल्लेय लोक खोटल्यांनी आसात. मनशाक चड व्याजाची, झटपट फायद्याची, लाखांनी पगाराच्या नोकरेची आस आसता. थोड्यांक विदेशांत नोकरी म्हणल्यार पौंड, डॉलरांचो सर्गूच मेळिल्ले सारकें दिसता. सगलेच एजंट वा जायराती फटकिऱ्यो नासतात. तरीय तरणाट्यांनी त्यो बारीकसाणेन पारखून घेवंक जाय. नाजाल्यार अर्थीक लुकसाण जाताच, पूण जीव वचपाचीय भिरांत आसता. कांय तरणाट्यांक अश्या एजंटांनी फटयल्यात. अर्थीक, शारिरीक आनी मानसीक त्रास केल्यात. मात, आमचे नदरे मुखार इतलीं उदाहरणां आसतनाय आमी धोको हड्ड्यार मारून धाडसान मुखार सरतात आनी मागीर फटवतात. उपरांत पुलीस कागाळ करून गुन्यांवकारांक ख्यास्त जातलीच अशें ना. कारण ते ऑनलायन वावुरपी फटिंगाचे पाय आसतात. हालींच मायणा- कुडटरेच्या एका तरणाट्याक विदेशांत नोकरी दिता अशें सांगून आपोवन घेतलो. थायलॅण्डांत नोकरी दितां अशें सांगून अनवळखी गांवांत व्हेलो आनी बोगस बिटकॉयन कंपनींत काम दिलें. थंय ताचे खूब हाल केले. डेटा एंट्री ऑपरेटर म्हूण ताका धाडिल्लो. पयलीं म्यानमार शिमेचेर आनी उपरांत मुखार खंयतरी ताका व्हेलो अशें पुलीस सांगतात. म्यानमार आनी बँकॉकाच्या भारतीय दुतावासाक लागून तो सुटलो.
गोंयकार तरणाट्यांनी कोणाय एजंटांचे मजतीन विदेशांत नोकरेक वचपाचो नाद सोडचो. ताचे बदला आयटीआयंत विदेशी भाशां सयत विवीध कुशळटायो शिकून घेवच्यो. उपरांत विदेशांत नोकरेचें सपन निश्चीतूच पुराय जातलें, अशें मुख्यमंत्र्यान कालूच सांगलां. नोकरे बाबतींत खात्री केले बगर पावल उबारचें न्हय, अशें पुलीस अधिक्षकान म्हणलां. परदेशांत नोकरी दिवपाच्या निमतान अर्थीक फटवणूक करपाचे प्रकार दक्षीण गोंयांत वाडत आसात, अशेंय तांणी सांगलें. कुडटरेच्या तरणाट्या वांगडा आनीक कांय भारतीय आशिल्ले. हाचो अर्थ फाटल्या कांय वर्सां सावन पूर्वे कडल्यान देशांनी हीं नोकरी दिवपाचीं रॅकेटां चलतात. भारत सरकारान ह्या देशां कडेन उलोवणी करून बेगोबेग मार्ग काडपाक जाय. फक्त बोगस नोकरे आड अॅडव्हायझरी जारी करून कांय साध्य जावचें ना. त्या देशांच्या सरकारांनीय पावलां उखलपाची गरज आसा. नाजाल्यार ते बदनाम जातले. हे देश धर्मीक नदरेन भारताक लागींचे आशिल्ल्यान दरवर्सा लाखांनी भारतीय पर्यटक थंय वतात. ह्या देशांनी ताचोय विचार करपाक जाय.
कंबोडिया, लाओस, फिलिपीन्स, थायलॅण्ड, व्हिएतनाम अश्या सगल्याच देशांनी हे ठकसेन वावुरतात. कंबोडिया, लाओसांत चड. खास करून ह्यो नोकऱ्यो ऑनलायन. कॉल सेंटरांतल्यो. डेटा एन्ट्री, टायपिंगाच्यो, लोकां कडेन संपर्क करपाच्यो. तांचे एजंट दुबय, सिंगापूर, भारतांत सगल्या राज्यांनी आसात. कुडटरेचो तरणाटो मडगांवच्या एका एजंटा मार्फत गेल्लो. सादी मुलाखत, टायपींग परिक्षा घेवन ते नोकरी दितात. बरो पगार, व्हिसा, विमानाची तिकेट, रावपाक हॉटेल….! नोकरेक सुरवात जातकच तांकां लाओसांतल्या गोल्डन ट्रँगल खाशेल्या अर्थीक विभागांत काम करपाक व्हरतात. थंय कैद्यां सारकेंच रावपाचें. बेकायदेशीर कामांनी घुस्पल्ल्यो टोळयो तांकां आपल्या हाता खाला दवरतात आनी शारिरीक, मानसीक छळ करून रातदीस काम करून घेतात. अश्याच कांय तरणाट्यांक फाटीं भारत सरकारान पुलिसांचे मजतीन सोडोवन हाडिल्ले. हालींच भारतीय तरणाट्यांक चड पगाराचें हांयस दाखोवन एके टोळयेन फटोवन थायलॅण्डाक व्हेले, उपरांत लाओसाक आनी थंय कॉल सेंटरांत नोकरी दिवन अमेरिका, युरोपांत बोगस कॉल करपाक लायले. आतांय मोबायल फोनाचेर ज्यो मॅसेजी, कॉल येतात, ते ह्या देशांतल्यानूय येतात आसतले. अंडर वर्ल्डांत सोंपेपणी पावल दवरपाक मेळटा, पूण थंयच्यान परत येवपाचो मार्ग नासता, अशें म्हणटात. तसलोच प्रकार हो. तेन्ना भारताच्या परराष्ट्र वेव्हार मंत्रायलान मंजूर केल्ल्या अधिकृत एजंटाचे मजतीनूच विदेशांत नोकरेक वचप बरें.
गोंयांत नोकरेच्या निमतान भायर वचप्यांचो आंकडो खूब व्हड आसा. चडशे आपलो सोयरो गेल्लो आसल्यार ताचे मजतीन वतात. कांय जाण स्वतंत्रपणान वतात. थोडे फटवल्यातूय आसतले. तेन्ना तांणी ह्या विदेशी नोकरेचे बाबतींत जावपी धोक्यां विशीं सगल्यांक सांगपाक जाय. थंय वतना नेमकी कसली सादूरताय बाळगुपाक जाय, तें नवें पिळगेक कळप गरजेचें. एजंटांनीय आपूण विदेशांत तरणाट्यांक धाडटलों, ती कंपनी बोगस काय खरी, ताची पयलींच खात्री करून घेवपाक जाय. फक्त पयशांचेर दोळे दवरून उपकारचें ना. तांणी आनी नोकरे खातीर विदेशांत वचपी तरणाट्यांनीय!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
