भांगरभूंय | प्रतिनिधी
पोट भरपा खातीर दरेकल्याक नोकरी, वेवसाय, धंदो हो करपाकूच जाय. ताका लागून थोडे गांव, राज्य, देशूय सोडटात. थोडे मेळटा त्या पगारांत खोशी आसतात. पूण थोड्यांक उण्यांत उणें काम करून चडांत चड पगार वा फायदो कसो जातलो, हाचोच ध्यास लागिल्लो आसता. ते खातीर ते नोकऱ्यो सोडीत आसतात. तर थोडे धंदेकार चड फायद्या खातीर गैरप्रकार करतात. नोकरदारांचे बाबतींत बऱ्याच लोकांची फक्त आनी फक्त विदेशांत नोकरी करपाची इत्सा आसता. हाचे फाटलें कारण म्हणल्यार चड पगार आनी विदेशाचें आकर्शण. योग्य मार्गान विदेशांत वचपी साल्वार जातात, पूण बरेच फावट कसलीय नोकरी धरपी फोंडांत पडटात. कित्याक तर, तांकां नोकरी दिवपी एजंट बोगस वा गुन्यांवकार आसतात.
‘सायबर स्लेवरी जॉब स्कॅम’ प्रकरणांत हालींच तिगांक अटक केल्ली. तांचे चवकशी करतकच भितर गोंयांतले कांय तरणाटे फटवल्ल्याचें पुलिसांक दिसून आयलें. अटक केल्ल्या मदीं मुंबय, चेन्नय, दिल्ली (मूळ चीनी नागरीक) रावपी एजंट आसा. ते बँक खातीं, सीम कार्डां भाड्यान घेवन तांचेर काॅल करून तरणाट्यांक फटयताले. व्हाॅट्सअॅप आनी टेलिग्राम ह्या सोशल मिडिया अॅपांचेर रॅकेट चलयतालें. स्वता आॅनलायन बसका घेताले. नोकरेची मुलाखत, पयशे कशे घेवप हें ताचेर थारायताले. ह्या ठकसेनांक बरेच तरणाटे बळी पडल्यात, असो गोंय पुलिसांक दुबाव. विदेशांत नोकर भरती करपी फक्त णव मान्यतायप्राप्त एजन्सी गोंयांत आसात. बोगस एजन्सी चलोवप्यांनी गोंयच्या कांय लोकांची मजत घेतल्या, असो पुलिसांक दुबाव आसा. ते नदरेनूय तपास चलता. तरणाट्यांनी खास करून पूर्वे कडल्या देशांनी नोकरी मेळयतना सादूर रावंक जाय. कारण हांगा ठकसेनांच्यो जायत्यो एजन्सी आसात. थंय वचप धोक्याचें न्हय, पूण बारीक चवकशी केले बगर पावल उखलपाक जायना, अशें पुलिसांचें म्हणणें.
विदेशांत खंयचीय नोकरी पळयतना, थंयचें वातावरण, कायद्यांचो पयलीं अभ्यास करपाक जाय. एजंटाची सरकारा कडेन नोंद आसा काय ना, तें तपासपाक जाय. विदेशांत वचून आयिल्ल्या 2- 3 जाणां कडेन चवकशी तर करपाकूच जाय. भुल्लुसून वचप धोक्याचें थारूं येता. वचपाक खर्च कितलो, काॅण्ट्रेक्ट, व्हिसा…. सगलीं कागदां तपासून पळयले बगर मुखार वचपाक जायना. चडूच आकर्शक आस्वासनां दिल्लीं आसत, तर सादूर जावप बरें. एजंट सादारण 30- 35 हजार रुपया फी घेतात. विमानाची तिकेट आनी हेर खर्च सोडून.
https://www.emigrate.gov.in/#/emigrate ही वेबसायट मतींत दवरपाची. तांचे कडेन नोंदणी जाल्ले एजंट नात जाल्यार दोन पावलां फाटीं सरल्यार बरें. जांचे वेबसायटीचेर कायम आॅफिसाचे पत्ते, फोन नंबर नात, सरकारी नोंदणेची म्हायती ना, ते धोक्याचे. भरपूर पगार, रावपाक फ्लॅट, अर्ज करपाची सोंपी पद्दत बी आसल्यारुय दुबाव घेवचो. नोकरेचें आॅफर लेटर येता, तेन्ना ताचेर विदेशी कंपनीची निशाणी आसता. हेर म्हायती आसता. ती तपासले बगर तें नेमणुकेचें पत्र स्विकारपाक जायना. व्हिसा येता ती कामाची काय पर्यटक म्हूण, तेंय नदरे पोंदच्यान घालपाक जाय. ह्यो नोकऱ्यो सोदपाच्यो खंय, तर ते खातीर ही परराष्ट्र वेव्हार मंत्रालयाची वेबसायट. तिचेर खंयच्या देशांत कसली नोकरी आसा, एजंट कोण, ताचो परवानो…. ही म्हायती इसीआर (इमिग्रेशन क्लियरन्स रिक्वायर्ड) विभागांत आसता. प्रोटेक्टर आॅफ इमिग्रंट्साचो (पीओई) फोन नंबरुय दिला. ताचे भायर भारतीय वेपारी कचेरी, दुतावास (तांचो आनी नोकरेच्या देशांतलो आमचो दुतावास) हांचेय संपर्क नंबर, पत्ते, ईमेल आसतात. हें सगलें विदेशांत वचपाक सोदपी तरणाट्यांनी पळोवंक जाय. दुतावासा कडेन चवकशी करप तर सामकें गरजेचें.
कितलेय सादूर रावले तरीय फटवणूक जावपाची शक्यताय न्हयकारपाक येना. कारण हे तोपी मास्टर वेवसायीक गुन्यांवकार आसतात. तुमी फटवपाचे आसात वा फटवल्यात जाल्यार लागींच्या पुलीस स्टेशनाचेर कागाळ करची. मागीर पणजेच्या सायबर विभागाक. पीओईक फोन करून सविस्तर म्हायती दियात. ईमेल धाडात. परराष्ट्र वेव्हार मंत्रालय, इमिग्रेशन अॅण्ड कस्टम्स एन्फोर्समेंटाक कळयात. ताचेर फोन नंबर आसात. सगल्यांत म्हत्वाचें म्हणल्यार सगलीं कागदां सांबाळून दवरचीं. पत्रवेव्हार, फोना वयलें संभाशण, ईमेल म्हायती, रोजगार दिवपी कंपनीचे फोन, संपर्क, एजंटाची म्हायती, पयशे धाडल्यात ताची रिसीट…. सगलें सांबाळून दवरपाची गरज आसा. वयर दिल्या ते वेबसायटीचेर कागाळ करपाचो अर्ज पसून आसा.
सरकारा कडेन नोंद जाल्ल्यो 2.76 विदेशी कंपनी आसात, तर 2000 एजंट. दरवर्सा चार लाख भारतीय कायदेशीर पद्दतीन भायर वतात. फाटीं बांबोळेच्या एका तरणाट्याक म्यानमारांतल्यान सोडोवन हाडिल्लो. ताका एजंटान थायलॅण्डांत नोकरी आसा म्हूण व्हेल्लो. मागीर बोटींतल्यान म्यानमाराक आपोवन एका बंद काॅल सेंटरांत दवरिल्लो. ताचे कडेन संपर्क करपी तरणाटी आशिल्ली. नोकरी दितकच रातदीस काम करून घेतात, उणो पगार दितात. तुमकां भायर संपर्क करूंक मेळना, असलेय प्रकार घडल्यात. ताणें दिल्ले म्हायती वयल्यानूच हें रॅकेट सांपडिल्लें. तेन्ना, विदेशांत वचप्यांनी शितिदान पावल घालप फायद्याचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
