भांगरभूंय | प्रतिनिधी
खबरां संस्था
मुंबयः अजिंक्य रहाणेच्या मुंबय पंगडान अदूंच्या सिझनांत अश्टतासी कामगिरी करून सात वर्सां उपरांत रणजी करंड आपल्या नांवार केलो. फायनलींत तांणी विदर्भाक 169 धांवड्यांनी हारयलें. रणजी क्रिकेस सर्तींतले मुंबयचें हे विक्रमी 42 वें जैत आसा. विदर्भान खर झूंज दिवंन मुंबय सहजासहजी जैतिवंत जावपाक दिलें ना. अक्षय वाडकर, करूण नायर आनी हर्ष दुबे हांणी मुंबनय दिल्लें दोंगरा येदें लक्ष्या मेरेन पावपोच यत्न केलो पूण मुंबयच्या शिलेदारांनी निमणे मेरेन यत्न करून निमाणे रणजी करंडाचेर आपलें नांव कोरातीत केलें. धवल कुलकर्णीन ताच्या निमणे रणजी मॅचींत निमणी ओव्हर घालून विदर्भाच्या धाव्या बॅट्समनाक आवट केलें.
बिरेस्ताराक पांचवो आनी निमण्या दिसाचो खेळ सुरू जालो तेन्ना विदर्भाचो पंगड 5 आवट 248 धांवड्यांचेर खेळटालो. तांकां जैता खातीर 290 धांवड्यो आनी मुंबयक 5 विकेटींची गरज आशिल्ली. अक्षय वाडकर आनी हर्ष दुबेची जोडी पांय रोमून उबी आशिल्ली. वाडकरना रणजी फायनलींतले ताचो दुसरो शेंकडो पुराय केलो. 9 चौके आनी 1 सकको मारून 102 धांवड्यो करपी वाडकाराक मुंबयच्या तनुष कोटीयाना एलबीडब्ल्यू करून विदर्भाक व्हडलो धपको दिलो. त्या उपरांत तुषार देशपांडेन दुबेक कॅच आवट करून विदर्भाच्या जैताचे आशेर उदक वडयलें. आदित्य सरवटेची विकेटूय देशपांडेन घेतली. तनुष कोटीयनान यश ठाकूराक क्लीन बोल्ड केलें. कॅप्टन अजिंक्य रहाणेन निमणी विकेट घेवपाचें काम अणभवी धवलाचेर सोपयली आनी ताणे उमेश यादवाक बोल्ड करून मॅच मुंबयच्या नांवार केली.
मुंबयन आपल्या पयल्या डावांत 224 धांवड्यो केल्ल्यो. विदर्भाचो पयलो डाव 105 धांवड्यांत सोपलो. दुसऱ्या डावांत मुशीर खानाचो शेंकडो, श्रेयस अय्यराच्यो 95 आनी अजिंक्य रहाणेच्या 73 धांवड्यांच्या नेटार मुंबयन 418 धांवड्यो करून जैता खातीर विदर्भाक 538 धांवड्याचें लक्ष्य दिल्लें. अथर्व तायडे आनी ध्रुव शोरी हांणी 64 धांवड्यांची भागिदारी करून विदर्भाच्या दुसऱ्या डावाची बरी सुरवात करून दिल्ली. मात शम्स मुलाणी आनी तनुष कोटीटनान तांकां आवट केलें. 133 धांवड्यांत तांच्यो 4 विकेटी पडल्यो. करूण नायरान स्फोटक खेळी करून 74 धांवड्यो केल्यो. ताका चवथ्या दिसाचो खेळ सोपतना मुशीर खानान कॅच आवट केलें. विदर्भाचो दुसरो डाव 134 ओव्हरीतं 368 धांवड्यांत सोपलो आनी 169 धांवड्यांनी तांका हार खावची पडली.
मुंबयन निमणे रणजी जैत पद 2025-16 च्या सिझनांत मेळयल्लें. ते मॅचींत खेळल्ल्या श्रेयस अय्यर, शार्दुल ठाकूर आनी धवल कुलकर्णीन अंदूचे फायनलींत म्हत्वाची कामगिरी केली. 8 वर्सां पयलीचे फायनलींत श्रेयसान शेंकडो केल्लो. हे मॅचींत ताणे 95 धांवड्यांची खेळी केली. शार्दुल ठाकूरान पयल्या डावांत 75 धांवड्यो केल्यो. धवल कुलकर्णीन वट्ट 4 विकेटी घेतल्यो. मुंबयचो स्टार खेळगडो तनुष कोटीयनान रणजी माळ वीर म्हणून जाल्यार मुशीर खान मॅन ऑफ दी मॅच म्हणून भोवमानीत केलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
