भांगरभूंय | प्रतिनिधी
उदरगती खातीर निधी सयत प्रस्ताव सादर करतले : मुख्यमंत्री
पणजीः गोंयांत उदरगत आनी तरेकवार प्रकल्पांच्या कार्यवाही खातीर राज्य सरकार वित्त आयोगा कडेन मागण्यां सयत प्रस्ताव सादर करतलें अशी म्हायती मुख्यमंत्री डॉ. प्रमोद सावंत हांणी दिली.
16वो वित्त आयोग गोंयाक 9 आनी 10 जानेवारीक गोंयांक भेट दितलो. हे फाटभुंयेर डॉ. प्रमोद सावंत हांणी खातें मुखेली आनी सचिवांची बसका घेतली. वित्त आयोगा कडेन करपी मागण्यांचो बसकेंत विचार जालो. निधिचो विनियोग आनी साधनसुविधांच्या कामांचेर बसकेंत चर्चा जाली. म्हत्वाच्या खात्यांची अर्थीक स्थिती आनी खर्चाचेर विचार जालो. मुळाव्या सुविधांचो प्रकल्पांचेर कितले पयशे खर्च जाल्यात, तशेंच फुडारांत कितलो खर्च अपेक्षीत आसा, हाचोय मुख्यमंत्र्यांनी बसकेंत नियाळ घेतलो.
राज्याची उदरगत आनी अर्थीक गरज विचारांत घेवन सरकार वित्त आयोगा कडेन तरेकवार प्रस्ताव आनी मागण्यो सादर करतले. निधी सयत हेर मजतीचीय मागणी करतले, अशी म्हायती मुख्यमंत्री डॉ. प्रमोद सावंत हांणी दिली.
वित्त आयोग सरकारा सयत थळाव्या संस्थांच्या प्रतिनिधीं कडेन भासाभास करतलो. मागण्यो आनी निधी विशीं चर्चा करतलो. सल्लामसलतीचेर आधारीत वित्त आयोग राज्याक निधी विशीं निर्णय घेता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
