भांगरभूंय | प्रतिनिधी
परंपरीक चिखल कालो उमेदीन, विवीध खेळां प्रकार लेगीत सादर
भांगरभूंय । प्रतिनिधी
दिवचल : ‘हरी रे माझ्या पांडुरंगा’चो गजर करीत आनी एकामेकाचेर चिखल मारीत विठ्ठलापूर सांखळे व्हाळवाट न्हंयेदेर परंपरीक चिखल कालो उमेदीन मनयलो. जाण्टे- नेण्टे विठ्ठलभक्तांनी ह्या चिखल काल्यांत वांटो घेवन चिखलांत रंगून गेल्ले. ह्या वेळार विवीध परंपरीक खेळां प्रकार लेगीत सादर केले.
दुसरें पंढरपूर म्हूण फामाद आशिल्ल्या विठ्ठलापूर सांखळेचें व्हाळवाट न्हंयेदेगेर भावीक पुंडलीक देवळा मुखार परंपरे प्रमाण आनी प्रथे प्रमाण चिखल कालो मनयतात. वर्सांतल्यान दोन खेपे जावपी गोपाळकालो म्हणल्यारूच चिखल काल्यांत जाण्टे- नेण्टे व्हड संख्येन वांटो घेतात. आशाढी आनी कार्तिकी एकादसी उपरांत त्रयोदशीक म्हणल्यार तिसऱ्या दिसा हो चिखलकालो विठ्ठलापूरा मनयतात.
सकाळीं विठ्ठल रखुमायेची पालखी देवळांतल्यान व्हाळवाट न्हंयेदेगेर आयले उपरांत दनपारां विठ्ठलापूर आनी सांखळेचे बालगोपाळ पुंडलीक देवळा लागसार जमतात, पुंडलीक देवळांत फोवांचे लाडू तयार करतात. देवळा मुखार चिखला खातीर एक रेबकांड तयार करतात. तातूंत खूबसो चिखल निर्माण करतात. ते उपरांत व्हाळवाट न्हंयेदेगेर आशिल्ल्या देव सांखळेश्वर कडेन परंपरीक ढोलकी वाद्या सयत आरती म्हणटात.
आरत्यो सोंपले उपरांत चिखल काल्यांत वांटो घेतिल्ल्या विठ्ठल भक्तां मदीं विवीध परंपरीक खेळ रंगतात. तातूंत रिंगण घालप, लांब उडी मारप, वेलांटी मारप, कपड्यान मारप अशें खेळ खेळून जाले उपरांत एका मनशाचेर देवीचो भार हाडटात. तो भार कृत्रीम आसता, पूण त्या भार आयिल्ल्या मनशाक विवीध प्रस्न विचारतात, ताका तो भार जाप दिता. ल्हान भुरगीं आपूण परिक्षेंत पास जातली न्हय, अशे प्रस्न विचारतात. जाल्यार कांय मटको मोगी नंबर खंयचो येतलो, अशेंय प्रस्न विचारतात. हो प्रकार खूब मनरिजवण करपी आसता. ते उपरांत भक्तां खातीर हाडिल्ले खावपाचे पदार्थ वा फळां उंच वयर शेंवटितात. ती जिखून घेवपाक विठ्ठलभक्तांची व्हड सर्त लागता.
हे खेळां प्रकार चालू आशतना मदींच तरणाट्यांचे गट कोणा कोणाक चिखलाच्या रेबकांडांत घेवन वतात. ताचेर चिखल घालून ताचें आंग रंगोवपाचे प्रकार चालूच आसतात. ह्या पुराय सुवाळ्याचो तातूंत वांटो घेवपी दरेकलो मजा घेता.
हे सगले खेळां प्रकार आनी चिखलांत रंगून जाले उपरांत देव विठ्ठल रखुमायेची पालखी व्हाळवाट न्हंयेचेर व्हरतात. थंय विधी प्रमाण श्रींचेर उदकाचो अभिशेक करतात. तांच्या आंगा वयल्यान उदकाचो अभिशेक करतात तें उदक तीर्थ म्हूण सगले चिखल काल्यांत वांटो घेतिल्ले पियेतात. ते उपरांत पालखी विठ्ठलाच्या देवळांत व्हरतात आनी थंय आरत्यो जातात. प्रसाद म्हूण तांणी केल्ले फोवांचे लाडू वांटले उपरांत ह्या आगळ्या सुवाळ्याची सांगता जाता. हो चिखल कालो फाटल्या खूब वर्सां सावन विठ्ठलापूरांत मनयतात. ह्या वाठारांतले बालगोपाल व्हड प्रमाणांत तातूंत वांटो घेतात आनी खेळाचो आनंद घेतात. चलत आयिल्ले प्रथे प्रमाण हो चिखल कालो मनयतात, अशें प्रकाश नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
