भांगरभूंय | प्रतिनिधी
पांडुरंग हो विष्णुचो अवतार. देखून तो पुराय सृश्टीचो सांबाळ करपी देव. आषाढ म्हयनो विठ्ठलाच्या गजरांत तल्लीन जाता. आषाढांतल्या शुद्ध पक्षांत पडपी एकादशीक आषाढी वा देवशयनी एकादस अशेंय म्हण्टात. देखून हे एकादशी दिसा घरांतलो दरेक व्यक्ती विठ्ठलाची उपासना करता. दीसभर कडक उपास करता. आपली इत्सा पुराय जावची अशें पांडुरंगा कडेन मागता. वर्साच्या वट्ट २४ एकादशींतल्यान आषाढी एकादशीक खाशेलें म्हत्व आसा. कारण हे एकादशी दिसा लाखांनी भक्त, वारकरी वारी घेवन पंढरपूराक वतात. आदल्या तेंपार वताले ताचे परस फाटल्या धा वर्सांच्या काळांत वारकऱ्यां मदीं दुपेटीन वाड जाल्या. सगळ्यांक आपल्या जिवितांत एकदां तरी वारीचो अणभव घेवपाची इत्सा आसता. वारीचें दर्शन हें प्रत्यक्षांत पांडुरंगाचें दर्शन.
संत ज्ञानेश्वर, संत तुकाराम, संत नामदेव, संत एकनाथ, संत जनाबाय, संत मुक्ताबाय ह्या व्हड संतांनी संत परंपरेचो वारसो वाडयला. कोण ल्हान ना, कोण व्हड ना, सगळेच समान अशी समानतायेची भावना सगळ्या संतांनी रुजयल्या. आषाढी एकादशी सावन चातुर्मास सुरू जाता. हे भगवान विष्णु शेषनागाचेर न्हिदतात, ते चार म्हयन्यांनी चातुर्मास सोंपले उपरांत कार्तिकी एकादशीक जागे जातात, अशी भक्तांची श्रद्धा आसा.
आषाढी एकादशी दिसा आळंदी सावन ज्ञानेश्वराची, देहू सावन तुकारामाची, त्र्यंबकेश्वरांतल्यान संत निवृतीनाथाची, उत्तर भारतांतल्यान संत कबीराची आनी पैठणांतल्यान एकनाथ महाराजाची पालखी विठोबाचे दर्शन करपा खातीर पंढरपूराक येतात. ह्या पालखे वांगडा सगळे भक्त विठ्ठलाच्या नांवाचो जप करतात. एकादशी दिसा भक्त फांतोडेर उठून चंद्रभागा न्हंयेंत न्हातात आनी तुळशी पानां घेवन विठ्ठलाची पुजा करतात. विठ्ठल हो प्रत्यक्षांत विष्णुचो अवतार. विठ्ठलाच्या पांयांचेर तकली दवरून सगळे भक्त मनीसजातीच्या कल्याणा खातीर आनी येवपी आडमेळीं पयस करपा खातीर आंगवण करतात.
एकादशी देवता ब्रह्मा, विष्णू आनी महेशाच्या स्वासांतल्यान निर्माण जाली आनी तिणें सौम्य राक्षसाक मारलो. आयज धर्तरेचेर आशिल्ल्या सगळ्या जिवां खातीर स्वास (ऑक्सिजन) सांबाळप गरजेचें आशिल्ल्यान झाडां रोवपाक जाय. कोरोना काळांत सगळो संवसार आॅक्सिजना खातीर धडपडटालो. धर्तरेक आनी धर्तरे वयले जीव वाटावपा खातीर आषाढी एकादशीच्या निमतान, घर थंय झाड, पडंग जमनी, मेकळे वाठार, दोंगर हांगां व्हड प्रमाणांत झाडां लागवड करपाक जाय. हे खातीर मुखेलपणान सरकार, सामान्य लोक, अधिकारी, फुडारी, समाजीक संघटनांनी फुडाकार घेवचो आनी झाडां रोवपाक म्हत्व दिवचें. हाका लागून गोरवांक जीणभर चारो आनी ऑक्सिजन मेळपाक खूब आदार जातलो. आयज रान संपत्त वाचोवप गरजेचें. कारण दर एका झाडांत, पानांत, फुलांत आनी फळांत आमकां विठ्ठलाचें दर्शन जातलें. देखून, आतां सगळ्यांनी झाडां लावून सगलें पाचवेंचार करूया, प्रदुशणाचेर मात करुया. पुंडलिका वरदे हरी विठ्ठल.
रमेश कृष्णराव लांजेवार
99216 90779
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
