भांगरभूंय | प्रतिनिधी
मनशाचें सगळे जिवीत विज्ञानाचेर अवलंबून आसा. विज्ञाना बगर आमचें जिवीत अर्दकुटें आसा अशें म्हणल्यार अतिताय जावची ना.
आमी ज्यो गजाली वा वस्तू वापरतात तातून कणाकणांत विज्ञान भरील्लें आसा. विज्ञान नाशिल्लेंच जाल्यार मनीस आपलें जिवीत सुखान कसो जियोवपाचो? विज्ञाना बगर पर्याय ना हेंच खरें.
आयज विज्ञानाच्या क्षेत्रांत भारत देश खंयच फाटीं ना. आमचो देश दिसानदीस विज्ञानाच्या क्षेत्रांत विकसीत जायत आसा, घडतं आसा आनी मुखार आपलें पावल मारीत आसा. भारत देशांत कितलेशेच वैज्ञानीक घडले आनी घडत आसात. जांणी विज्ञानाच्या मळार देशाचें नांव अज्रवंर केलां. तांचे प्रत्येक प्रयोग, प्रत्येक सोद देशाचें नांव घडयत आसा. भारत देशांत जल्मल्ले वैज्ञानिकांनी भायल्या देशांनी काम पसून करुन भारतीयांची हुशारी सिद्ध केल्ली आसा. भारताचो तिरंगो हुबपाक थंयूय कळाव लागलो ना.
काल विज्ञान दीस म्हूण सगल्यांनी मनयलो. विज्ञान दीसा निमतान पुराय देशभरांत तरेकवार कार्यावळी जातात. वैज्ञानिक कार्यालयां, शाळा, विद्यालयां, महाविद्यालयां, संशोधन करपी कार्यालयां आनी हेर कडेन हो दीस व्हडा दबाज्यान मनयतात. शाळांनी तर ह्या दिसाचें व्हडपण खूप मोठे. शाळेंत विज्ञानीक प्रदर्शन घडोवन हाडटात. तशेच भुरगीं वेगवेगळे प्रयोग करून दाखयतात. खूप कडेन कार्यशाळा घडोवन हाडटात. विज्ञानिक चर्चासत्रां घडोवन हाडिल्ली दिसून येता.
ह्या दिसाचें खाशेलपण म्हळ्यार सर चंद्रशेखर वेंकट रमण हाणीं ह्याच दिसा रमण परिणामाचो सोद लायलो म्हूण हो दीस विज्ञानदीस म्हूण मनयतात. ह्या दीसा तांका खाशेलो मान जावन आसा.
विज्ञान हो मनशाच्या जिविताचो एक मुखेल असो घटक जावन आसा. पयलींच्या काळार कसलीय महामारी आयली वा दुयेंस वाडलें जाल्यार सारको उपाय मेळपाक कठीण जातालें. आयज ती परिस्थिती उरली ना. आयज जाय तशी वखदां, वासीना येवंक लागल्यात. हें सगळें विज्ञानाक लागून घडूक शकलें.
पयलींच्या काळार कसल्याय रोगाचें निदान करप सोपें नासलें. हळू हळू मशिनां आयलीं आनी मनशाचें जिवीत सोंपें जायत गेलें.
शिक्षणाच्या मळार नवीं उपकरणां आयलीं, जाका लागून शिक्षण सोपें जावंक मदत मेळ्ळी. वेगवेगळी यंत्रां, उपकरणां आयलीं आनी मनशाचें जिवीत सुखमय जालें, पूण याद दवरात प्रत्येक गजालीक दोन बाजू आसतात. वायट आसता तशीच बरीय बी. समतोल बाळगप आमच्या हातात आसता. विज्ञानाच्या आहारी वचून स्वताभितर आळशेपणाचें बीज रुजोव नाकात. विज्ञाना वांगडा जगात, विज्ञान शिकात, फुलयात आनी ताचो योग्य तो वापर आमच्या देशाच्या हिता खातीर करात.
शिल्पा लाड
8411007204
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
