भांगरभूंय | प्रतिनिधी
एससीईआरटी वतीन प्रशिक्षण दिवपाची वेवस्था
पणजी : राष्ट्रीय शिक्षण धोरणाच्या अभ्यासक्रमा प्रमाण विध्यार्थ्यांक शिकोवप शक्य जावचें म्हूण विज्ञान आनी गणीत शिक्षकांक बंगळूरूच्या इंडियन इन्स्टिट्यूट ऑफ सायन्स हे संस्थेंत धाडून प्रशिक्षण दिवपाचो उपक्रम सरकारान सूरू केल्लो. आतां प्रशिक्षणा खातीर प्रयोगशाळा तशेंच हेर सुविधा आसपी केंद्र एससीईआरटी, पर्वरीचे इमारतींत स्थापन जाल्ल्यान शिक्षकांक आयआयएससी, बंगळूरू हांगा धाडपाची गरज पडची ना. आनीक कांय दिसांनी प्रशिक्षण केंद्राचें उक्तावण जावन शिक्षकांक प्रशिक्षण दिवपाक सुरवात जातली. राज्य शिक्षण संशोधन आनी प्रशिक्षण मंडळाच्यो (एससीईआरटी) संचालक मेघना शेट गांवकार हांणी ही म्हायती दिली.
यत्ता णवी तशेंच धावे खातीर एनईपी अभ्यासक्रमा प्रमाण विज्ञान आनी गणीत शिकोपा खातीर शिक्षकांक प्रशिक्षण दिवपाचो निर्णय शिक्षण खात्यान घेतलो. हे प्रमाण आतां मेरेन गणित विशयाच्या ८० आनी विज्ञान विशयाच्या ८० शिक्षकांक प्राशिक्षण दिलां. शिक्षकांक आयआयएससी, बंगळूरू हांगा दोन भागांनी धाडून हें प्रशिक्षण दिला. सगळ्या शिक्षकांक बंगळूरू हांगा धाडप शक्य नाशिल्ल्यान आतां एससीईआरटी, पर्वरी हांगा प्रशिक्षणाची वेवस्था केल्या. हाचे खातीर आयआयएससी, बंगळूरू हांगचे प्रो. राव हे लेगीत गोंयांत येवन गेले. प्रो. राव हांच्या मार्गदर्शना खाला प्रशिक्षण अभ्यासक्रम तयार जातलो. शिक्षकांचे भाग करून तांकां प्रशिक्षण दितले. थारावीक दिसा आयआयएससी, बंगळूरूचे तज्ज्ञ प्रोफेसर गोंयांक भेट दिवन मार्गदर्शन दितले. उरिल्ल्या सगल्या विज्ञान आनी गणित शिक्षकांक प्रशिक्षण दिवपाची मोख आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
