भांगरभूंय | प्रतिनिधी
इंडिया गाॅट लेटेंट हे यु्ट्यूब कार्यावळींत जाल्लो वाद अजून शांत जावंक ना. सर्वोच्च न्यायालयान दखल घेतिल्ल्यान ताका वेगळें मोडण मेळ्ळां. युट्युबर रणवीर अलाहाबादिया (बीयरबायसेप), आशिश चंचलानी, जसप्रीत सिंग, अपूर्वा मखिजा आनी ह्या चॅनलाचो मुखेली समय रैना हांचे आड आसाम, जयपूर, महाराष्ट्रा सयत साबार कडेन कागाळी दाखल जाल्यात. तातूंत कांय जाणांनी तांची तकली कापप्याक पांच लाखांचें इनाम जाहीर केला. ह्या पांच जाणांनी अटकपूर्व जामिना खातीर अर्ज केलो तेन्ना सुनावणे वेळार कोर्टान तांचे कान पिळ्ळे. तुमच्या मेंदवांत चिखल दाटला, अशी प्रतिक्रिया दिली. मात तांकां अटक करूं नाकात, अशे निर्देशूय दिले. देशा भायर वच्चें न्हय, अशेंय सांगलां. अलाहाबादीन उपरांत सोशल मिडियाचेर माफी मागली. त्या स्पर्धका कडेनूय चूक मागली. पूण तो उलयलो तें चुकीचें आशिल्लें.
कांय अपुरबुद्दांक सदांच आपणें कितें तरी वेगळें करचें, उलोवचें, बरोवचें, अशें दिसता. असले मनीस म्हान व्यक्ती जाल्यात. पूण चडश्यांचें हांशें जालां. तांचेर टिका जाल्या. तांचे चळवळीचें, कार्यावळीचें, मोहिमेचें वा हेर संबंदीत गजालीचें लुकसाणूय जालां. समय रैनाची ही कार्यावळ. थंय स्पर्धकांनी 90 सेकंद काॅमेडी वा कसलीच कला सादर करपाची. ते कार्यावळींत अलाहाबादीन एका स्पर्धकाक उद्देशून पालकांच्या लैंगीक संबंदा वयल्यान एक प्रस्न केलो. भारतीय समाजाचो, संस्कृतायेचो विचार केल्यार तो सामको बुरसो, अनैतीक आशिल्लो. दुबावूच ना. उपरांत चौगूय परिक्षक हांसले. कितें प्रस्न विचारलो रे तुवें अशें म्हणीत ताका शाबासकीय दिली. अलाहाबादीन शूटिंग बंद जातकच त्या स्पर्धकाची आनी प्रेक्षकांची माफी मागीत आपल्या तोंडांतल्यान चुकून हीं उतरां गेलीं, अशी सारवासारव केली. पूण चुकून उतरां गेलीं ही सुरय फटास. मुळांत ही कार्यावळ किल टाॅनी हे इंग्लीश कार्यावळीची काॅपी. तातूंत दोग जाण परिक्षक आसतात. तेय कांय वेळार वादग्रस्त थारल्यात. अलाहाबादीन विचारिल्लो तो प्रस्न ओजी क्रू युट्यूब ग्रुपाच्या ट्रूथ ड्रिंक्स हे कार्यावळींत एक बायल एका तरणाट्याक विचारता. तो तश्या तसो काॅपी केला. हाचे वयल्यान कार्यावळीची संकल्पना, आराखडोच न्हय, तर प्रस्न, विनोदांचीय चोरी जाता, हें सिद्ध जालां. हे दोनूय व्हिडियो सोशल मिडियाचेर आसात. विदेशांत हें चलता. हे बाबतींतले तांचे विचार खूबच फुडारिल्ले आसात. कांय भारतियांचेय आसात, पूण अलाहाबादी ताचेय फुडें गेलो. देवांचेर, संतांचेर वादग्रस्त उलयतात, ते पसून हेच लायकीचे. चुकून तोंडांतल्यान उतरां गेलीं, वाक्याचो वेगळोच अर्थ काडलो. समजूं येता. मात थोडे जाणूनबुजून उलयतात आनी निमाणें माफी मागतात.
सोशल मिडियाचेर 10- 12 लाख फाॅलोव्हर आशिल्ल्यांक हें सगलें करून कितें मेळटा, तेंच कळना? कितें तरी जगा वेगळें केलें काय इतिहासांत अमर जातले, अशें बी तांकां दिसता? इतलेंच जर खोरजता जाल्यार तांणी अंधश्रद्धा, चुकीच्या, कालबाह्य चालिरितींचेर उलोवपाक, बरोवपाक जाय. त्यो नश्ट करपाक वावुरपाक जाय. बळी दिवप, विधवा भेदभाव, बालविवाह, समाजीक दुस्वास…. कितलेशेच विशय आसात. उलोवपा परस, कृती करप बरें. ती करपी खरो समाजसुधारक, फुडारिल्लो मनीस. बाकीचे फक्त उतरांचे बुडबुडे काडपी पोके विचारवंत!
उलयतना व्हांवपाची संवय आशिल्ल्यांनी तर चडूच जतनाय घेवंक जाय. हे कार्यावळीच्या परिक्षकांक आनी तांच्या कुटुंबांक जिवेशीं मारपाच्यो धमक्यो मेळपाक लागल्यात. आवयच्या क्लिनिकाचेरूय हल्लो जावं येता, अशी भिरांत अलाहाबादीन उक्तायल्या. हाताक सांपडल्यार उन्मादान भरिल्ले लोक कितेंय करपाक शकतात. ‘तांकां सुरक्षा दिवची. पूण तांणी पासपोर्ट पुलिसां कडेन दिवचे. फुडलो आदेश मेळ मेरेन कसलीच कार्यावळ करची न्हय’, अशें सर्वोच्च न्यायालयान म्हणलां. सोशल मि़डियाचेर येवपी आक्षेपार्ह मजकूर, व्हिडियों बाबतींत मार्गदर्शक तत्वां तयार करचीं अशेंय तांणी सरकाराक सांगलां. न्यायमुर्ती कांत हांणी असल्यो कार्यावळी पळोवपाचे पिरायेचें बंधन घालपाचो वेळ आयला, अशें मत उक्तायलां. पालक, भयणी, पुराय समाजाक तो प्रस्न आयकून लज जातली, तुमी समाजाक गृहीत धरपाक शकनात, अशेंय तांणी सांगलां.
विचार स्वातंत्र्याच्या नांवा खाला कितेंय करप, स्वताक आधुनीक विचारांचो समजून कितेंय उलोवप, बरोवप हें एक वेळ विदेशांत खपत, पूण भारतांत एका विशिश्ट संस्कारांत, मानसिकतायेंत वाडिल्ल्यांक हें आवडपाचें ना. आपल्याक लागून दंगली पेटूं शकतात, हाचें भान उलोवप्यांनी दवरपाक जाय. कारण हालींच्या वर्सांनी समाज खूबच संवेदनशील जाला. ताच्यो भावना कित्याक लागून दुखत तें सांगपाक येना. तातूंत तो ‘गुन्यांवकार’ ताचे विचारसरणेच्या विरोधांतलो आसल्यार मागीर विचारपाक नाका!!
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
