भांगरभूंय | प्रतिनिधी
बिहारांत सोरो पियेवन 40 परस चड लोकांक मरण आयिल्ल्याची दुर्दैवी घडणूक हालींच घडली. विखारी सोरो पियेवन मृत्युकांड घडिल्ल्याची ही देशांतली पयलीच वेळ नासली तरी अश्यो खूबशो घडणुको हाचे आदीं देशांत घडल्यात. दर वर्सा अशी एखाद्री तरी घडणूक घडटाच. स म्हयन्यां पयलीं तामिळनाडूंत अशीच दुर्दैवी घडणूक घडिल्ली. फाटल्या वर्सा पूर्व पंजाबांत विखारी सोरो पियेवन 90 लोकांचे बळी गेल्ले. बिहार राज्यांत तर अश्यो खूबशो घडणुको घडल्यात. दोन वर्सां पयलीं बिहारांतूच विखारी सोरो पियेवन 36 जाणांक आपलो जीव व्हगडावचो पडिल्लो. बिहार हें राज्य जाल्यार विखारी सोऱ्या खातीर प्रसिद्ध आसा काय कितें असो दुबाव आतां येवंक लागला. कारण विखारी सोऱ्याचे सगल्यांत चड बळी हे बिहार राज्यांतूच गेल्यात.
ऑक्टोबर 2022 वर्सा बिहारांत विखारी सोरो पियेल्ल्यान 72 जाणांक मरण आयिल्लें. मार्च 2022 वर्सा 12 जाण जाल्यार नोव्हेंबर 2021 वर्सा 42 जाणांक मरण आयिल्लें. आतांय थंयच परतून ही दुर्दैवी घडणूक घडल्या. फाटले घटनेंतल्यान कसलोच बोध घेवंक नाशिल्ल्यानूच अशा दुर्दैवी घडणुकांची पुनरावृत्ती जायत आसा. विशेश म्हणल्यार बिहार राज्यांत पुरायेन सोरो बंदी आसा. विखारी सोऱ्याच्या कांडात 40 परस चड लोकांक मरण आयले उपरांतूय सदचे प्रमाण बिहारचे मुख्यमंत्री नितीश कुमार हांणी चवकशीचे आदेश दिल्यात. ते खातीर एसआयटी नेमून पुराय घडणुकेची चवकशी करून दोशींचेर कायदेशीर कारवाय करपाची घोशणा तांणी केली. पूण हातूंतल्यान विशेश अशें कितें हाताक लागतलें अशें दिसना.
एखादी दुर्दैवी घडणूक घडली आनी तातूंत कांय नागरिकांक मरण आयलें की ते घडणुकेची चवकशी करपा खातीर चवकशी आयोगन नेमप ही आमच्या देशांत सदचीच गजाल जाल्या. पूण त्या चवकशी आयोगाचे मुखार कितें? तातूंतल्यान दोशींचेर ख्यास्त जाता? ख्यास्त जाली जाल्यार अशा घडणुकांची पुनरावृत्ती कित्याक जाता? हें प्रस्न अजून लेगीत सुटावे जायनात. मुळांत अश्यो घडणुको घडच्यो न्हय हे खातीर सरकार कितें यत्न करता हें म्हत्वाचें आसा. विखारी सोरो उत्पादीत करून तो विकता आसतना बिहार सरकार आनी थंयची पुलीस यंत्रणा कितें करताली हो खरो प्रस्न आसा.
सोऱ्याची निर्मिती करपी सोऱ्यांत अल्कोहोल, धतुरा आनी युरिया घालताले अशी म्हायती मुखार आयल्या. हो सोरो तयार करपा खातीर नवसागर आनी मिथायल अल्कोहोल ह्या सारक्या रसायनांचो लेगीत वापर करतात. हे सगले पदार्थ मनशाचे कुडी खातीर घातक आसात. हें खबर आसून लेगीत ताचो सोऱ्या खातीर सर्रास वापर करतात. आमच्या देशांत परवानो नासतना सोरो विकप हो गुन्यांव आसतना गांवगिऱ्या वाठारांतूच न्हय जाल्यार शारांतूय अवैध सोऱ्याच्यो भट्ट्यो जाग्या जाग्यांनी दिसतात. ह्या भट्ट्यांनी अवैध पद्दतीन सोरो उत्पादीत करतात. हे पुलिसां सयत प्रशासनाक लेगीत खबर आसता. पूण ह्या सोरो माफियांनी पुलिसां सयत प्रशासनाचे लेगीत हात आदींच ओले केल्ल्यान ते ताचे कडेन आडनदर करतात. ताचो परिणाम म्हूण अश्यो दुर्दैवी घडणुको घडटात.
एखादी घडणूक घडली वा वरिश्ठ अधिकाऱ्यांची भोंवडी आसत जाल्यारूच कारवायेचे नाटक करतात आनी कांय दिसांनी आशिल्ली तशी परिस्थिती परतून निर्माण जाता. सोरो माफिया आनी पुलीस प्रशासनांतले भ्रश्ट अधिकारी हांच्या अभद्र युतीक लागूनच अश्यो दुर्दैवी घडणुको घडटात. जो मेरेन ही भ्रश्ट युती तुटना आनी भ्रश्ट अधिकाऱ्यांचेर खर कारवाय जायना तो मेरेन ह्यो घडणुको थांबतल्यो अशें दिसना. हे घडणुकेची देशभर चर्चा जाल्ल्यान बिहार पुलिसां वेलें चेपण वाडलां. ताका लागून तांणी कांय लोकांक अटक केली. पूण ही अटक फक्त दिख्याव्या पुरती आसा. ल्हान नुस्त्याक अटक करून बिहार पुलीस कारवायेचो दिखावो करतात. व्हड नुस्तें म्हणल्यार सोरो माफियांक अटक करपाचे धाडस बिहार पुलीस दाखोवंक शकनात.
अर्थांत सोरो पियेवपी लोक तांचे कडेन येतात म्हणून ते सोरो विकतात हेंवूय तितलेंच खरें आसा. साेऱ्याच्या आहारी गेल्ले लोक सोरो मेळ्ळो ना जाल्यार जो सोरो मेळटा तो पितात. आपूण जो सोरो पिता ताका लागून आपलो जीव लेगीत वचूंक शकता हाचेंय तांकां भान नासता. सोरो माफियांचेर कारवाय करपा बरोबरूच सोऱ्याच्या आहारी गेल्ल्या लोकांक समुपदेशन करून तांकां वेसनमुक्त करपा खातीर लेगीत शासन पांवड्या वेल्यान यत्न जावंक जाय.
श्याम ठाणेदार
9922546295
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
