भांगरभूंय | प्रतिनिधी
धिंदवाडो, खबरां संस्था: मध्य प्रदेशांत 23 भुरग्यांच्या मरणाक कारण थारिल्ली कोल्ड्रिफ कफ सिरपाची कंपनी श्रीसन फार्माचे संचालक गोविंदन रंगनाथनाक अटक केली. मध्य प्रदेश सरकारान स्थापन केल्ल्या विशेश तपास पंगडान (एसआयटी) बुधवार आनी बिरेस्तारा मध्यानरातीं तामिळनाडूच्या चेन्नयंत छापो घालो आनी रंगनाथनान अटक केली.
रंगनाथनाचेर 20,000 रुपयांचें इनाम आशिल्लें. तो ताचे बायले सयत फरारी आशिल्लो. चेन्नय, चेन्नय-बंगळुरू महामार्गावेलें रंगनाथनाचें 2000 चौरस फूट वाठारांतलें अपार्टमेंट सील केलां, जाल्यार कोडंबक्कमचें तांचें कार्यालय बंद आसा.
मजगतीं, कोल्ड्रिफ सिरपाचे चवकशेंत एक व्हड गजाल उक्ती जाली. तामिळनाडूच्या ड्रग्ज कंट्रोल डायरेक्टराच्या अहवालांत हें सिरप नॉन-फार्मास्युटिकल ग्रेड केमिकल्स पसून केल्ल्याचें उक्तें जालें.
चवकशे मजगतीं, कंपनीच्या धनयान तोंडी कबूल केलें कीं, तांणी दोन शिपमेंटांत प्रोपीलीन ग्लायकॉलच्यो 50 किलांच्यो दोन पोतयो विकत घेतिल्ल्यो. हाचो अर्थ कंपनीन 100 किलो विखारी रसायन विकतें घेतिल्लें. चवकशे मजगतीं कसलेच तरेचें बील मेळूंक ना. तशेंच विकत घेतिल्ल्याचीय नोंद करूंक ना. चवकशे मजगतीं, तपास अधिकार्यांक सांगलें, पयशे केन्ना रोख जाल्यार केन्ना जी- पे वरवीं दिताले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
