भांगरभूंय | प्रतिनिधी
रेवोडेंच्या 17 वर्सांच्या भुरग्याक घोणस चाबून मरण येवपाची दुखेस्त घडणूक हालींच घडली. फाटल्या सप्टेंबरांत काणकोणचे नागरीक नंदा सतरकार हांकां अशेंच सोरोप चाबून मरण आयिल्लें. तांकां काळखांत कितें चाबलां तें कळूंक नाशिल्लें. हाॅस्पिटलांत उपचाराक उशीर जावंक नाशिल्लो जाल्यार ते घडये जगपाचे. रेवोडें दुर्घटनेंतल्या सार्थक च्यारीक सोरोप चाबला तें कळ्ळें. ताचेरूय बरींच वरां उपचार चल्ले, तीन हाॅस्पिटलां बदल्लीं, अशें कळटा. हाॅस्पिटलांनी भलायकी सुदारतले अशें परिणामकारक उपचार जायनात, वखदां नासतात, अशें म्हणपाचें? काय ‘ताचो वेळ आयिल्लो’ अशें म्हणून हें सोडून दिवपाचें? ना. केन्नाच ना. शक्य तितली खबरदारी, उपाय आमी घेवंक जाय.
नाग, काणेर, फुरशें आनी घोणस हे भारतांतले चारूच विखारी सोरोप. काळ्या रंगांचो आंगार धवीं रिंगां आशिल्लो काणेर चड भिरांकूळ. कारण तो चाबलो म्हूण कळटाच अशें ना. ताचीं लक्षणांय उसरां दिसतात. नाग चाबता थंय दोन बुराक दिसतात. पांयांक संवेदना नासत जाल्यार कोण चाबला तेंय कळना. आॅगस्टांत बंगळुरूंत एका अभियंत्याक जोत्यांत लिपिल्लो सोरोप चाबलो तो निमाणें मेरेन कळूंकच ना. घरच्यांक कळ्ळें तो मेरेन ताका मरण आयिल्लें. सोरोप हालींसराक दुर्मीळ जाल्यात. रेवोडेंच्या भुरग्याक सोरोप चाबलो थंय आडगळ आसा. वर्सांचीं वर्सां दवरिल्ल्यो गाडयो आसात. झिली वाडल्यात. काळोखूय आसतलो. पंचायतीक सांगूनय हांगां नितळसाण जावंक ना, अशें गांवकारांचें म्हणणें. वास्तवीक जंय रान वा जाग नाशिल्लो जागो आसा, थंय रावपी लोकांनी खूबच सादूर रावपाक जाय. कारण सोरोप थंय येतातूच, वयल्यान आतां बिबटे, रानदुकर, गवे, वांस्वेलां, साळी भोंंवपाक लागल्यात. रानां खात्यान हाचे कडेन लक्ष दिवंक जाय. क्लब, मंडळां अदीं मदीं नितळसाण करतात. पूण स्वराज्य संस्थांचीय ती लागणूक.
घोणस चाबतकच त्या भुरग्याक तीन कडेन व्हेलो, पूण गूण पडपी वखद नाशिल्लें, अशें कांय जाणांचें म्हणणें. थोड्या भलायकी केंद्रांनी मलमपट्टी करून दुयेंतीक तालुक्यांतल्या हाॅस्पिटलांत, थंयच्यान जिल्हो आनी उपरांत जीएमसींत धाडटात. हें प्रकार केन्ना बंद जातले? गरजेचीं वखदां, दोतोर, उपकरणां हाताळपी तंत्रज्ञ आसूंक जाय. ते हांसऱ्या मुखामळाचे, नम्र आसचे. परंपरीक सरकारी मानसीकताय निदान हाॅस्पिटलांनी तरी नासची. सुणो, सोरोप चाबल्यार दिवपाचीं इंजेसांवां दरेका हाॅस्पिटलांत आसचीं. तींय बी बऱ्या दर्जाचीं. दुयेंतींक म्हापश्यां, पणजे, फोंंड्यां व्हरपाचो वेळ येवंक जायना. 108 सेवेच्यो गाडयो वाडयल्यार बऱ्यो. जीएमसीच्या दर्जाचे उपचार सगल्या भलायकी केंद्रांनी जावचे. नर्सींक, दोतोरांक सोरोप चाबिल्लो मनीस येत जाल्यार ताचेर कसले उपचार करप तें खबर आसूंक जाय. तांणी ते बेगोबेग करपाक जाय. वीख चडटकच पळोवयो, ही वृत्ती नाका.
सोरोप चाबपाक जायना म्हूण उपाय घेवपाक जाय. घराभोंवतणी झिली, कोयर, फातर, पत्रे, लांकडांचो दाळ आसल्यार तो काडचो. घरा भोंवतणी उजवाड जाय. नासल्यार ती वेवस्था करची. जोतीं, खास करून बूट घालचे पयलीं ते हालोवन पळोवंक जाय. कोठयेची कूड नितळ दवरची. हुंदरांचेरूय नियंत्रण जाय. सोरोप चाबल्यार कितें करपाचें तें खबर आसचें. चाबिल्लो भागाची चड हालचाल उपकारना. संबंदीत मनशाक धीर दिवंक जाय. चाबिल्लो जागो नितळ धुंवचो. गांवठी उपचार करिनासतना ताका हाॅस्पिटलांत व्हरचो. ह्या बोवाळांत सोरोप कसलो तें कळ्ळ्यार बरें. हालींच्या वर्सांनी कांय प्राणीइश्ट सोरोप धरून व्हरतात. तांचे नंबर सगल्यां कडेन आसचे. गांवांनी नदरेक पडटात ते सोरोप अटंग्या रानांनी व्हरून सोडप गरजेचें. स्वराज्य संस्थानी फुडाकार घेवं येता. सोरोप चाबपाच्यो घडणुको दर सप्तकांत घडटात. ते खातीर लोकांनी सादूर रावचेंच, पूण भलायकी केंद्रांनीय सज्ज रावचें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
