भांगरभूंय | प्रतिनिधी
उज्जैन, खबरां संस्था: दोन वर्सां आदीं मध्य प्रदेशांतल्या उज्जैनच्या विक्रम विद्यापीठान सकाळीं आनी सांजेवेळार कॅम्पसांत येवप्यांचेर ऑक्सिजन कर लायिल्लो. हातूंतल्यान २५ लाख रुपया एकठांय जाले. ह्या पयशांतल्यान विद्यापीठान ३५ हजारां परस चड रोंपे लायले. तशेंच कॅम्पसांत १२ उद्यानांची निर्मिती केल्या. तशेंच दोन तळीं बांदल्यांत. ५०० लोक सदांच सकाळीं आनी सांजे वेळार कॅम्पसाक भेट दिवपाक येतात. विद्यापीठांत प्रवेश घेवपी विद्यार्थ्यांकूय एक रोंपो लावपाक उर्बा दिता. आतां मेरेन ५० भुरग्यांनी रोंपे लायल्यात. ह्या रोंप्यांची जतनाय विद्यार्थी पदवीधर जायसर घेतले.
विक्रम युनिव्हर्सिटीचे कुलगुरू अखिलेश पांडे हांणी सांगलें, एक ल्हानशी वनस्पत सदांच ४५० लिटर ऑक्सिजन दिता. जाल्यार दरेके व्यक्तीक सदांच ७५० लिटर ऑक्सिजनाची गरज आसता. रोंपे लावपाक आमी विद्यापीठ वाठारांत भोंवपाचेर ऑक्सिजन कर लायलो. ताचे परिणाम बरे गावले.
ऑक्सिजन टॅक्साक लागून नागरिकां मदीं जागृताय
पांडे हांणी, संवसार ग्लोबल वॉर्मिंगाचे समस्ये कडेन झुंजता. ही समस्या सोडोवपाक झाडां सगळ्यांत म्हत्वाची भुमिका करतात. सैमान आमकां ऑक्सिजन दिलां. ताका लागून दरेकल्यान एक झाड लावप. सोयरे कॅम्पसांत २ ते २.५ वरां रावतात. हे सगळे कॅम्पसांत येवन ऑक्सिजन घेतात. ताका लागून तांचेर ऑक्सिजन कर लायलो. देखून लोकां मदीं झाडां विशीं जागृताय वाडल्या. आतां विद्यापीठांतूय उदक सांठून उरतलें. उदक आडावपाक ल्हानशीं फोंडकुलां मारतले.
वनस्पतींची सेवा करात
दोन वर्सां सावन विक्रम विद्यापीठ वाठारांत वंय घालून विंगड विंगड नांवान झाडां रोवपाची मोहीम राबयली. तातुंतल्यान आयएमए फॉरेस्ट, सुरज वाटिका, भलायकी वाटिका, लता वाटिका, खालसा वाटिका, सलुजा वाटिका, स्मृती वाटिका, सुरभी वाटिका, शिव वाटिका, समर्पण वाटिका तयार केलें. झाडांच्या इश्टां वरवीं दर आयतारा सकाळीं ७ ते ९ वरांचेर रोप्यांची सेवा करतात, अशें उज्जैनचे सेवा समिती अध्यक्ष अजय भातखंडे हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
