भांगरभूंय | प्रतिनिधी
चंद्रकला नायक: कुटुंबांत कसलोच दुरावो ना
फोंडें: फोंडें पालिकेचे वेंचणुके खातीर प्रभाग चारांतल्यान उमेदवारी अर्ज दाखल केल्ल्या चंद्रकला नायक हांणी आपल्या प्रभागांतलीं प्रलंबीत विकास कामां पुराय करपा खातीर अर्ज दाखल केला. कुटुंबांत कसलोच दुरावो जाल्लो नासून प्रभागांत खूबशीं विकास कामां पुराय करपाचे ध्येय बाळगिल्ल्याचें तांणी सांगलें.
प्रभाग चारांतल्यान देर व्यंकटेश नायक आनी भावजय चंद्रकला नायक हांणी बिरेस्तारा आपले उमेदवारी अर्ज सादर केल्यात. ताका लागून लढटीत चुरस निर्माण जाल्या. फाटल्या 5 वर्सांचे कारकिर्दींत आपणें खूबशीं विकास कामां राबयल्यात कांय प्रलंबीत आसात. प्रलंबीत कामां पुराय करून प्रभागाचो विकास करप होच हावेस आशिल्ल्यान परतून उमेदवारी अर्ज दाखल केला.
सद्या प्रचाराक बरो प्रतिसाद मेळटा आनी जैत निश्चीत आसा. फाटले वेंचणुके वेळार घरकार आनी कार्यकर्त्यांच्या बळार जैत मेळयिल्लें. ह्या वेळार लेगीत मतदारांनी केल्लो आग्रो आनी उरिल्लीं कामां पुराय करपा खातीर वेंचणूक लढयत आशिल्ल्याचें चंद्रकला नायक हांणी सांगलें.
प्रभागांत फाटल्या कितल्याशाच वर्सां सावन गार्डन उबारपाची मागणी आपले कारकिर्दींत पुराय जाल्ली. ताका लागून प्रभागांतल्या लोकांची उमेद वाडल्या. 5 मे दिसा जावपी पालिका वेंचणुकेंत व्हड मतांनी जैतिवंत जातलें अशें चंद्रकला नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
