भांगरभूंय | प्रतिनिधी
दुयेंसाक लागून भारताक दर वर्सा व्हड अर्थीक लुकसाणः बेन अँड कंपनी आनी नेटहेल्थ अहवाल
नवी दिल्ली, खबरां संस्थाः भारतांत वाडत वचपी दुयेंसांचो देशाचे अर्थवेवस्थेचेर व्हड परिणाम जाता अशें बेन अँड कंपनी आनी नेटहेल्थ हांच्या अहवालांतल्यान मुखार आयलां. ह्या अहवाला प्रमाण भारताक दर वर्सा सुमार 0.8 ते 1 ट्रिलियन डॉलर अर्थीक लुकसाण जाता. हें लुकसाण मुखेलपणान लोक दुयेंत पडिल्ल्यान तांकां काम करपाक मेळना वा काम करपाची तांक उणी जाल्ल्यान जाता. भारताक विकसीत देश करपाचो आसल्यार भलायकी क्षेत्राक प्राधान्य दिवप खूब गरजेचें. लोकांची भलायकी सुदारली जाल्यार देशाची अर्थीक उदरगतूय नेटान जातली.
ह्या अहवालांत स्पश्टपणान सांगलां की, देशाची प्रगती फकत उद्देग, तंत्रगिन्यान वा गुंतवणूक हांचेर आदारून नासता पूण त्या देशांतले लोक कितले भलायकेन बरे आसात हाचेरय व्हड प्रमाणांत आदारून आसता. लोक भलायकेन बरे आसत जाल्यार ते बरे काम करपाक शकतात आनी देशाचे उदरगतींत चड योगदान दिवंक शकतात. भारतांत सध्या व्हड संद आसा, कारण ह्या देशांत काम करपाचे पिरायेची लोकसंख्या व्हड आसा. पूण ही लोकसंख्या दुयेंत आसल्यार ही संद वाया वचूं येता. देखून लोकांक निरोगी दवरप खूब गरजेचें.
ज्या देशांनी लोक भलायकेन बरे आसात थंय अर्थीक वाड नेटान जाता अशें संवसारांतल्या जायत्या देशांनी दिसून आयलां. भारतांतय परिस्थिती कांय प्रमाणांत सुदारल्या. 1950 वर्सा लोक सरासरी 50 वर्सां बरे भलायकेन जियेताले आनी आतां ते सुमार 61 वर्सां मेरेन जियेतात. पूण हो आंकडो अजूनय वाडोवपाची गरज आसा.
तज्ञांच्या मतान ही पिराय 70 वर्सां मेरेन वाडयल्यार भारताची अर्थवेवस्था खूब नेटान वाडूंक शकता. ह्या अहवालांत चीन, दक्षीण कोरिया, पोलंड ह्या सारक्या देशांचीं उदाहरणां दिल्यांत. ह्या देशांनी आपल्या नागरिकांची भलायकी सुदारल्या आनी ताचो थेट फायदो तांच्या अर्थवेवस्थेक जाला. फाटल्या कांय वर्सांत तांणी व्हड अर्थीक प्रगती केल्या.
सद्या भारत सरकार भलायकेचेर जाडीपाच्या सुमार 2 टक्के खर्च करता. पूण हो खर्च 6 ते 7 टक्क्यां मेरेन वाडोवपाची गरज आसा अशें अहवालांत म्हणलां. हाका लागून हॉस्पिटल, दोतोर, वखदां आनी भलायकी सेवा सुदारतली. तशेंच, लोक दुयेंत पडचे पयलीं भलायकेन बरे दवरपाचेर लक्ष केंद्रीत करप गरजेचें. नेमान तपासणी, बेगीन निदान आनी वेळार उपचार केल्यार गंभीर दुयेंसां आडावंक मेळटात. भलायकी हो खर्च न्हय तर देशाच्या फुडाराची गुंतवणूक अशें तज्ञांचे मत आसा. लोक भलायकेन बरे आसले जाल्यार देश बळिश्ट आनी समृध्द जातलो. भारताक विकसीत देश जावपाचो आसल्यार भलायकी क्षेत्राक प्राधान्य दिवप खूब गरजेचें आसा. लोकांची भलायकी सुदारली जाल्यार देश आपोआप नेटान फुडें वतलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
