भांगरभूंय | प्रतिनिधी
प्रधानमंत्री नरेंद्र मोदी हांच्या केंद्रांतल्या सरकाराच्या तिसऱ्या कार्यकाळांतलें पयलें वर्स काल 9 जूनाक पुराय जालें. तिसऱ्या कार्यकाळांतलें हें पयलें वर्स म्हणल्यार प्रधानमंत्री नरेंद्र मोदी आनी तांच्या तिसऱ्या सरकारा खातीर कठीण अशा आव्हानांचेंच आशिल्लें. पूण दरेक आव्हानाक तितलेच ताकदीन तोंड दिवन मोदी सरकारान सगल्याच आघाड्यांचेर देशाक एका अशा मोडणार व्हरून दवरलो की ताची दखल घेवप सगल्यांकूच भाग पाडटा. ताचे कडेन कोणाकूच आडनदर करूंक येवची ना. राहुल गांधी आनी तांच्या काँग्रेसी सयत सगल्या विरोधी पक्षांक विरोधा खातीर विरोध करप भागच आशिल्ल्यान ताचे कडेन आडनदर करचेंच पडटलें. राहुल गांधी हांचो आयजकालचो नकारात्मक सभाव हो फक्त विरोधा खातीर विरोध आशिल्ल्याचें स्पश्टपणान जाणवता. ताका लागून काय खबर ना पूण पाकिस्तानांत राहुल गांधीक हालींच्या दिसांनी सुमारा भायर प्रसिद्धी मेळत आशिल्ल्याचें दिसून येता. आतां ताची कितली मेरेन दखल कोणे आनी कशी घेवप हो जाचो ताचो प्रस्न. लोकसभेचे वेंचणुकेंत वर्सभरा पयलीं नरेंद्र मोदी आनी तांच्या भारतीय जनता पक्षाक अपेक्षीत अशें भोवमत मेळूंक नाशिल्लें. जाल्यार काँग्रेसीन शेंकडो हुंपून तांच्या तिसऱ्या कार्यकाळांतलो प्रवास सुखकर जावचो ना अशेच कांयशें आव्हान दिल्लें. मोदी हांच्य तिसऱ्या कार्यकाळांतलें एक वर्स सोंपले उपरांत फाटल्यान वळून पळयत जाल्यार भोवमत नासून लेगीत हेर पक्षांच्या सहकार्यान मोदी सरकारान राष्ट्रीय आनी आंतरराष्ट्रीय आघाड्यांचेर जें कितें करून दाखयलें ताची अपेक्षा कोणेच केल्ली नासुये.
तिसऱ्या कार्यकाळांतल्या पयल्या वर्साचो आस्पाव केलो जाल्यार सेगीत इकरा वर्सां नरेंद्र मोदी हांचो हो काळ आसा. विकसीत भारताचो अमृतकाल, सेवा-सुशासन-गरीब कल्याणाची इकरा वर्सां, संकल्पांतल्यान सिद्धी अशा आशयाची जायरात उजवाडावन केंद्र सरकारान आपल्या कामाचें वर्णन सगलें कडेन केलां. विरोधकांची पोटदुखी अशा जायरातींक लागून अजून वाडटली हातूंत दुबाव ना, पूण फाटलें एक वर्स आनी ताचे आदींच्या धा वर्सांतल्या मोदी सरकाराच्या कार्याचो नियाळ घेत जाल्यार सरकार आपणे केल्ल्या कामाचे बाबतींत सरकार अतिशयोक्ती करीत आसा अशें दिसून येना. आतां फाटल्याच एका वर्सांत मोदी सरकाराच्या कार्या विशीं उलोवपाचें आसत जाल्यार स्पश्ट भोवमत मेळोवंक शकूंक नाशिल्ल्या भाजपा कडल्यान विशेश अशी अपेक्षा कोणेंच करूंक नाशिल्ली. ताचे आदींच्या धा वर्सांत दाखयिल्ली आक्रमकताय जाल्यार अपेक्षितूच नाशिल्ली. पूण प्रत्यक्षांत चित्र मात वेगळेंच दिसलें. मोदी सरकारान आपलो आक्रमक अजेंडा मुखार व्हरतना सरकारांतले तेलगू देसम आसूं वा जनता दल युनायटेड हांची कोणाचीच तमा बाळगूंक ना. तांच्या अजेंडांत पयलो क्रमांक आशिल्लो तो म्हणल्यार वक्फ मंडळ संशोधन विधेयकाक कायद्याचें रूप दिवपाचो. मोदी सरकाराच्या तिसऱ्या कार्यकाळांत पयल्याच वर्सा हो कायदो अस्तित्वांत येतलो अशें कोणाकूच दिसपा सारकी परिस्थिती नाशिल्ली. पूण हो कायदो अस्तित्वांत आयलो आनी विरोधक नाकार आपटले. इतल्याचेरूच मोदी सरकार रावलें ना जाल्यार अजून खूबशे विशय तांणी चालीक लायले.
आपल्या फाटल्या धा वर्सांच्या कार्यकाळांत आत्मनिर्भर भारत करपाची बुन्याद घालून ते बुन्यादीचेर एका फाटल्यान एक अशे स्थायी विकासाच्यो इमारती उबारल्यो ताची दखल इकरा वर्सांच्या ह्या कार्यकाळाचेर बरयतना घेवचीच पडटली. तिसऱ्या कार्यकाळांतल्या पयल्याच वर्सा जें धाडस मोदी सरकारान खूबशे निर्णय घेतना दाखोवन दिलें ते पळयत जाल्यार विरोधकांचे अस्तित्वूच दिसून येना. प्रभावी लोकशाये खातीर बळिश्ट विरोधी पक्षाची गरज आसा, हें मान्य करतनाय राहुल गांधी हांचे सारक्या अपरिपक्व मनशा कडेन विरोधकांचें फुडारपण गेल्ल्यान आयज ही वेळ आयल्या हें मान्य करचेंच पडटलें. 2019 वर्साच्या लोकसभा वेंचणुकेंतले राहुल गांधी आयज नव्यान सामकार येवंक लागल्यात. अशे परिस्थितींत सरकाराचेर अंकुश उरतलो तरी कसो. मोदी सरकाराची घोडधांव ताका लागूनच आयज कोणूय आडावंक शकतलो अशें दिसून येना. मोदी सरकार आसा ते परिस्थितींतूय कशे धाडशी निर्णय घेवंक शकतात हाचें सगल्यांत ताजें उदाहरण म्हणल्यार ‘ऑपरेशन सिंदूर’ पहलगामांतल्या आतंकवादी हल्ल्यांत 26 निश्पाप पर्यटकांचे बळी गेले उपरांत पाकिस्तानी भुंये वेल्यान चलिल्ल्या आतंकवादाक सासणाचो सोंपोवपाच्या इराद्यान पाकिस्तानांत घुसून जी कारवाय केली त्या धाडसाक संवसारभरांतल्या देशांनी येवकार दिलो. तिनशें परस चड आतंकवाद्यांक हे कारवायेंत मारून उडयले आनी मोदी सरकारा खातीर ही कारवाय खूब फळादीक थारली. भारतीय सैन्यान तीन दिसांच्या झुजांत पाकिस्तानाचें जें भेंड मोडलें तें सगलेंच अकल्पनीय अशेंच आशिल्लें.
पाकिस्तानान पोशिल्लो आतंकवाद परतून तकली वयर काडचो ना अशें सद्याचें चित्र आसा. पाकिस्ताना कडली खूब पोरणी सिंधु न्हंय कबलात स्थगीत करपाचो घेतिल्लो निर्णय हो मोदी सरकारा खातीर मास्टर स्ट्रोक थारलो. आतंकवादाक जशाक तशी जाप दिवपाच्या ह्या धाडसाक लागून मोदी सरकार आनीक उजवाडांत आयलें. फाटलीं इकरा वर्सां विकसीत भारताचो अमृतकाल अशें म्हणटात. ते खातीर उल्लेखूच करपाचो आसत जाल्यार स्वच्छ भारत अभियाना खाला बांदिल्ल्या 10 कोटी परस अदीक शौचालयांचो करचो पडटलो. तेच बराबर उज्ज्वला गॅस येवजण, वेपार प्रक्रिया सोंपी करपा खातीर लागू केल्ली जीएसटी, आयुष्यमान भारत विमो येवजण, 2014 सावन गरिबांक बँकिंग प्रक्रियेंत वांटेकार करून घेवपा खातीर चालू केल्ली जनधन येवजण अशा खूबशा येवजण्यांचो उल्लेख करचो पडटलो. काश्मीरांतलें 370 कलम रद्द करप, तीन तलाकाक कायमचो तलाक दिवप, अयोध्येंत रामाचें देवूळ उबारप अशा खूबशा गजालींक लागून आयज मोदी सरकाराची वेगळी प्रतिमा तयार जाल्या. आंतरराष्ट्रीय पांवड्यार जाल्यार भारताची प्रतिमा आनीक घटमूट जाल्या. आमची अर्थवेवस्था आतां चौदावे सुवातेर पावल्या आनी फाटल्या इकरा वर्सांत सरकाराच्या वेगळ्या वेगळ्या येवजण्यांनी 27 कोटी परस चड लोकांक अत्यंत गरिबींतल्यान भायर काडपाक मजत जाल्या अशें संवसारीक बँकेच्या निमाण्या अहवालांतल्यान पुश्टी जाल्या. खर निर्धारानच हें साध्य जालां. विरोधकांकूय हें पचोवंक मेळना हें खरें आसलें तरी पुरायपणान दाखयिल्ली नकारात्मकताय हें ताचेर वखद न्हय हाचें भान तांकां दवरचें पडटलें.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
