भांगरभूंय | प्रतिनिधी
पणजीः विकसीत गोंय २०३७ हो व्हिजन दोक्युमेंत ६४ व्या गोंय मुक्ती दिसा निमतान येता त्या १९ डिसेंबराक उजवाडाक हाडटले. गोंय हें २०३७ मेरेन सगल्यांत पयलीं विकसीत जावपी देशांतलें पयलें राज्य आसतलें, असो विस्वास मुख्यमंत्री डॉ. प्रमोद सावंत हांणी उक्तायलो.
जीसीसीआयन घडोवन हाडिल्लें पर्यटन क्षेत्राचें शिखर परिशदेक संबोदीत करतना मुख्यमंत्री डॉ. प्रमोद सावंत उलयताले.
आमी विकसीत गोंय २०३७ म्हणटा तेन्ना फकत एकाच मळाचेर न्हय तर सगल्या मळांचेर भर दिली आनी ताका लागून आमकां नियोजन करपाक सुरवात करपाक जाय, असो उलो मुख्यमंत्र्यान मारलो.
आमच्या पंगडान चडश्या क्षेत्रांनी वचून जाणकारांच्यो सुचोवण्यो घेतल्यात. जांणी आजून मेरेन आपल्यो सुचोवण्यो दिवंक नासत जाल्यार त्यो दिवच्यो. आमचो चाणक्य ग्रुप हे विशीं काम करता. फुडाराक उद्देग, पर्यटन, मीन, शिक्षण, सुविधा आनी मनीस संसाधन हाचो आसपाव व्हिजन दोक्युमेंतांत आसा, अशें मुख्यमंत्र्यान म्हणलें.
विकसीत गोंय २०४७ हो व्हिजन दोक्युमेंत आमी १९ डिसेंबर २०२५ वर्सा ६४व्या मुक्ती दिसा निमतान उजावाडाक हाडून फुडें ६ ते ७ वर्सा खातीर आमी चालीक लायतले. वर्स २०३७ मेरेन विकसीत जावपी गोंय हें देशांतलें पयलें राज्य आसतलें. राज्यांची दरडोई उत्पन्न आनी जीडीपी सगल्यांत चड आसा देखून गोंय हें विकसीत जावपी पयलें राज्य आसतलें. हातूंत कसलोच दुबाव ना, असो विस्वास मुख्यमंत्र्यान उक्तायलो.
अंत्योदय, सर्वोदय आनी ग्रामोदय तत्वाचेर काम करून विकसीत गोंय २०३७ वर्सा गोंयचो एकूय घराबो लायट, उदक, रस्तो, विमो आनी येरादारी पासत वंचीत रावचो ना. साधन सुविधा बाबतींत आमी ९० टक्के साधन सुविधा तयार केल्यात. आमी मनीस संसाधन तयार करपाक भरपूर यत्न करतात. पयलीं पर्यटन मळार युपी, बिहारचे लोक काम करताले आनी आतां ७० टक्के गोंयकार ह्या मळार काम करपाक. फुडारा खातीर तयार आसपी मनीस संसाधन आमकां तयार करपाक जाय, अशें मुख्यमंत्र्यान म्हणलें.
हे शिखर परिशदेंत खोलायेन चर्चा जाले उपरांत हे विशींचो अहवाल जीसीसीआयची अध्यक्ष प्रतिमा धोंड सरकाराक सादर करतले. जें कितें बर्यो गजाली आसात तांची आमच्या वेगवेगळ्या खात्यांत अंमलबजावणी करतले. जेणे करून आमी विकसीत गोंयां खातीर नियोजन करपाक शकतले, अशें आश्वासन मुख्यमंत्र्यान दिलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
