भांगरभूंय | प्रतिनिधी
भांगरभूंय । प्रतिनिधी
पणजी : गोंय बांदकाम नियमन कायद्यांत गरजेचे बदल करून शार वाठारांतलीं एक हजार, जाल्यार ग्रामीण वाठारांतलीं 600 चौखण मिटरां वयलीं बांदकामां नियमीत करपाची हमी मुख्यमंत्री डॉ. प्रमोद सावंत हांणी 2025-26 खातीर बुधवारा जाहीर केल्ल्या अर्थसंकल्पांतल्यान दिली. सरकारान अंदूं लेगीत करांत कसलीच वाड करूंक ना, अशें सांगून शिरगांवची लयराईची जात्रा आनी मडगांवचे दिंडीक राज्य उत्सव म्हूण तांणी जाहीर केलें. चालू वर्साचो 28,162 कोटींचो अर्थसंकल्प मुख्यमंत्र्यान अर्थसंकल्पीय अधिवेशनाच्या बुधवारा निमाण्या दिसा सादर केलो.
मालकी हक्क नाशिल्ल्या गोंयकारांक मेळटले अधिकार
गोंय अनधिकृत बांदकाम नियमन कायदो 2016 त गरजेचे बदल करून शार वाठारांतलीं एक हजार आनी पंचायत वाठारांतलीं 600 चौखण मिटर क्षेत्रफळ आशिल्लीं बांदकामां नियमीत करतले. तशेंच आदीं सावन गोंयांत राबितो क रून आशिल्ल्या, पूण ते जमनीचेर मालकी हक्क नाशिल्ल्या गोंयकारांक जमनींचे अधिकार मेळोवन दितले, अशी घोशणा मुख्यमंत्री डॉ. प्रमोद सावंत हांणी केली.
अंदूं तिसऱ्या जिल्ह्याचे सोपस्कार
गोंयांतल्या तिसऱ्या जिल्ह्याचे सोपस्कार अंदूंच पुराय जातले, अशें मुख्यमंत्र्यान भाशणा वेळार सांगलें. तिसऱ्या जिल्ह्याचे स्थापने विशीं अजून मंत्रीमंडळ बसकेंत चर्चा जावंक ना. मंत्र्यां कडेन चर्चा करून तिसऱ्या जिल्ह्यांत खंयच्या खंयच्या म्हालांचो आस्पाव करपाचो ताचेर निर्णय घेतले, अशें तांणी सांजे वेळार घेतिल्ले पत्रकार परिशदेंत सांगलें.
सरपंच, पंच, आंगणवाडी कर्मचाऱ्यांचो पगार वाडटलो
चालू वर्सांत सरपंचांचें मानधन 2 हजार, जाल्यार पंचांचें मानधन एक हजार रुपयांनी वाडयतले. तशेंच आंगणवाडी सेविका, मजतनिसांचें मानधन लेगीत एका हजारान वाडयतले, अशें मुख्यमंत्री डॉ. सावंत हांणी जाहीर केलें.
आनीक णव खण लिजांची पावणी
खण खात्या कडल्यान आतां मेरेन 24 लीज आशिल्ल्या 12 ब्लॉकांचे पावणेची प्रक्रिया बेगिनूच सुरू करतले. तशेंच डंपाची पावणी लेगीत ह्याच वर्सा जातली, अशें मुख्यमंत्री डॉ. सावंत हांणी स्पश्ट केलें.
रस्त्यां खातीर 1,208 कोटी
गोंयांतल्या रस्त्यांची दुरुस्ती तशेंच हॉटमिक्स डांबरीकरण करपा खातीर अर्थसंकल्पांत 1,208 कोटींची तजवीज केल्या. हॉटमिक्स केल्ले रस्ते फुडलीं पांच वर्सां खणपाक बंदी घालतले, अशें मुख्यमंत्री डॉ. सावंत हांणी सांगलें.
दरेका वर्गाक लॅपटॉप
गोंयांत मिडल आनी सरकारी मुळाव्या शाळांच्या दरेका वर्गाक लॅपटॉप दितले. बालरथां खातीर नवो पर्याय सोदतले. तशेंच उच्च शिक्षणाचो दर्जो सुदरावचे कातीर क्लस्टर विद्यापिठाची स्थापना करतले, अशीय घोशणा मुख्यमंत्री डॉ. सावंत हांणी केली.
कोंकणी, मराठी, इंग्लिशीक न्याय !
मुख्यमंत्री डॉ. प्रमोद सावंत हांणी अर्थसंकल्पाचें वाचन करतना कोंकणी, मराठी आनी इंग्लीश या तिनूय भाशांक न्याय दिलो. अर्थसंकल्पाची सुरवात आनी शेवट तांणी मराठींतल्यान केलो. जाल्यार खात्या खातीरच्यो तजविजी कोंकणी सयत मराठी आनी इंग्लीश भाशेंतल्यान सांगल्यो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
