भांगरभूंय | प्रतिनिधी
राज्यपाल : अभिभाशणान शिंयाळी अधिवेशनाक सुरवात
भांगरभूंय । प्रतिनिधी
पणजी : प्रधानमंत्री नरेंद्र मोदी हांणी 2047 मेरेन विकसीत भारत करपाचें उद्दिश्ट दवरलां. विकसीत भारत 2047 चे धरतेर 2037 मेरेन विकसीत गोंय करपा खातीरचो आराखडो निमाण्या पावंड्यार पावला. 2037 मेरेन विकसीत गोंया खातीरची सगळीं उद्दिश्टां पुराय जातलीं, असो विस्वास राज्यपाला पुसापती अशोक गजपती राजू हांणी अभिभाशणांत उक्तायलो.
पांच दिसांच्या शिंयाळी अधिवेशनाची सुरवात सोमारा 12 जानेवारीक राज्यपाल पुसापती अशोक गजपती राजू हांच्या अभिभाशणान जाली. मुळाव्यो सुविधा, भलायकी, शिक्षण, वीज. भौशीक बांदकाम, शेती, उदका पुरवण, कला, समाज कल्याण, नुस्तेमारी ह्या सगल्या वाठारांतले कामगिरींचो नियाळ राज्यपालांनी अभिभाशणांत मांडलो.
अभिभाशणांत राज्यपालांनी मांडिल्ले खाशेले मुद्दे
– कुशावती ह्या तिसऱ्या जिल्ह्याक लागून मुळाव्यो सुविधा तयार जावन प्रशासन लोकांच्या दारांत पावतलें.
– पयलेच खेपे गोंयचो नकासो कोंकणींतल्यान तयार जाला. गोंयचें दायज, संस्कृती आनी कोंकणीक उर्बा मेळपाचे दिशेन म्हत्वाचें पावल.
– घर नांवार करपी ‘म्हजें घर’ येवजणेक लागून हॅप्पीनेस इंडेक्स (समाधान) वाडटलो.
– 28 फेब्रुवारी 2014 मेरेनचीं घरां नेमीत करपा खातीर भूंय महसूल संहितेच्या कलम 38 – ए मदीं दुरूस्ती.
– कोमुनिदाद जमनीतलीं घरां नेमीत करपा खातीर कोमुनिदाद कायद्यांत दुरूस्ती.
– रुका कायद्याखाला पंचायत वाठारांत 600 चौ.मि. आनी पालिका वाठारांत 1 हजार चौ. मि. मेरेनचीं बांदकामां नेमीत.
– जिल्हो पंचायत वेंचणूक घेवपा खातीर राज्य वेंचणूक आयोगाक परबीं.
– पद्मश्री खातीर लिबिया लोबो सरदेसाय आनी गोमंत विभूशण पुरस्कारा खातीर अजितकुमार कडकडे हांकां परबीं
– इफ्फी खातीरच्या मुळाव्या सुविधांक लागून गोंयची सर्जनशील रायपाटण अशी वळख.
– आंकडेवारी प्रमाण 2023- 24 वर्सा गोंयचो विकास दर 14.94 टक्के.
– कायदो सुवेवस्था नियंत्रणांत. गुन्यांवांच्या तपासाचें प्रमाण 87.72 टक्के.
– सायबर गुन्यांवांच्या तपासा खातीर एआय आदारीत तपास प्रणाली. सायबर क्रायम केंद्र जातलें घटमूट.
– सांगें, तळपण आनी मायणा कुडटरी पुलीस स्टेशनां खातीर नव्यो इमारती.
– सरकारी सेवा कार्यक्षम करपा खातीर कर्मचारी भरती आयोगा वरवीं गुणवान कर्मचाऱ्यांची भरती.
– कागाळी समस्या मांडपा खातीर नवो अॅड्रोयड आनी आयओएस आदारीत अॅप.
– उजो पालोपी दळान ऑक्टोबर मेरेन 140 मनशांक आनी 690 जनावरांचो जीव वाटायलो. 29.54 कोटींची मालमत्ता वाटायली.
– दिवचल, वास्को नवी फायर स्टेशनां. वाळपय फायर स्टेशनाचें रोखडेंच उक्तावण.
– रस्तो अपघात लुकसाण भरपाय येवजणे खाला 59 जाणाक 1.18 कोटींची भरपाय.
– ग्राम समृद्धी येवजणे खाला नोव्हेंबर मेरेन 10.65 कोटींची 26 कामां पुराय. 16 कामां पुराय जावपाचे वाटेर.
– गोंयच्या साक्षरतेचें प्रमाण 99.72 टक्के. राष्ट्रीय प्रमाण 95 टक्के.
– सरकारी म्हाविद्यालय सांखळी, खांडोळें आनी केप्यां हॉस्टेल सुविधा.
– 3048 शेतकारांक 239.48 लाखांची आदारभूत रकम.
– 1263 शेतकारां कडल्यान 1385.51 मॅट्रीक टन भाजयेची खरेदी.
– मुख्यमंत्री सुदारीत कामधेनू येवजणे खाला 27 शेतकारांक 66.58 लाखांचें अनुदान.
– 2023- 24 चे तुळेंत अंदूं नुस्त्याचें उत्पादन 1.17 टक्क्यांनी वाडलें.
– 12 खण ब्लॉकांची पावणी. 5 खण ब्लॉक सुरू. 252.83 कोटींची येणावळ.
– दोना पावल परिशद घरा खातीर निविदा जारी.
– रस्ते, इमारतींचे 1410.87 कोटींचे 59 प्रकल्प पुराय. 1002 कोटींचे 15 प्रकल्प सुरू.
– 75 कोटी रुपया खर्च करून सरकारी विद्यालयांची दुरुस्ती. 5 कोटी खर्च करून 3800 बांकडे, मेजां.
– 325.6 एमएलडी आलायत्या उदका खातीर उदका पुरवण प्रकल्प.
– तिळारीचें उदक बंद आसता तेन्ना उदकाची वेवस्था करपा खातीर 350 कोटी.
– फेब्रुवारी सावन पणजी- बेती मार्गाचेर व्हडल्यो फेरीबोटी.
– प्रशासन स्तंभ, वास्को बसस्टॅण्ड, जुन्ता हावस फेरबांदकामा खातीर 1721 कोटी.
– मोपा विमानतळ वाठारांत 93.14 हॅक्टर सुवातेंत मोपा आयुशी सीटी.
– 1341 कोटी खर्च करून भुंयगत वीज कॅबलांचें काम सुरू.
– सीझॅडएमपी 2011 मान्यताय मेळ्ळ्या. सीझॅडएमपी 2019 मसुदो तयार जातलो.
– कांक्रा खातीर 95702 चांचण्यो जाल्यो. 16 कांक्राचे दुयेंती जाले निश्चीत.
– डीडीएसएसवायचो 8671 जाणांक लाव, 33 कोटी खर्च.
– मॅडिक्लेम येवजणेचो 278 जाणांक लाव, 2.58 कोटी खर्च.
– दयानंद समाजीक येवजणेचे 123046 लाभार्थी.
– लाडली लक्ष्मी येवजणेचे 3562 लाभार्थी.
– पर्यटकांच्या प्रमाणांत 5.35 टक्के वाड. – देशी पर्यटक 4.81 टक्के, संवसारीक पर्यटक 17.67 टक्के वाड.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
