भांगरभूंय | प्रतिनिधी
पणजी: विंदालू एंटरटेनमेंट प्रायव्हेट लिमिटेडान अस्मिताय दिवसाच्या निमतान खास कोंकणी सिनेमा, तियात्र आनी गोंयच्या सांस्कृतीक दायजाक समर्पीत आशिल्लो ‘विंदालू’ हो नवो ओटीटी प्लॅटफॉर्म सुरू केल्ल्याची घोशणा केल्या. विंदालू, कोंकणी कंटँटा खातीर आयज मेरेन नाशिल्ल्या ओटीटी माचयेचो उणाव भरून काडटा.
खुबश्या वर्सां सावन कोंकणी कलाकार आनी चित्रपट निर्मात्यांक कला प्रेक्षकां मेरेन पावोवपा खातीर योग्य माची मेळनाशिल्ली. विंदालू हें चित्र बदलपा खातीर मुखार सरला. कोंकणी मनरिजवणेक स्वतंत्र मंच दिवन, हो प्लॅटफॉर्म नवे प्रतिभेक मुखार सरपाची संदूय दितलो.
विंदालूचे सह संस्थापक निखील देसाय हांणी म्हणलें, आमकां कोंकणी संस्कृती संवसारार पावोवपाची आसा आनी संवसाराक कोंकणी संस्कृती कडेन जोडपाचें आसा. विंदालूचेर विवीध तरेचो कंटँट आसा. हातूंत गोंयच्या चित्रपट निर्मात्यांचे २० कोंकणी चित्रपट, डिजिटायज केल्लीं तियात्र, नाटकां तशेंच पुरस्कार जैतिवंत दिग्दर्शक आनी कलाकारांचे खास कंटेंटांचो आसपाव आसा. हो प्लॅटफॉर्म अँड्रॉयड आनी आयओएस ह्या दोनायचेर उपलब्ध आसा.
विंदालूचे सुरवातेक लागून कोंकणी मनरीजवण मळाक व्हड आदार मेळटलो. ‘पे-पर-व्ह्यू’ मॉडेलाक लागून चित्रपट निर्मात्यांक आपल्या कंटेंटांतल्यान उत्पन्न मेळपाची संद मेळटली, जाका लागून कलाकारां खातीर नवे उत्पन्नाचे मार्ग उक्ते जातले. फुडल्या दोन म्हयन्यांत ३० परस चड कोंकणी कलाकृती प्रदर्शीत जावपाच्यो आशिल्ल्यान विंदालू कोंकणी मनरिजवणे खातीर मुखेल माची थारपाची आसा. भारता सयत यूएई, यूके, ऑस्ट्रेलिया, अमेरिका आनी कॅनडा अशा देशांनी उपलब्ध आशिल्लो हो प्लॅटफॉर्म गुगल प्ले स्टोअर वा ऍपल अॅप स्टोरावेल्यान डावनलोड करपाक मेळटा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
