भांगरभूंय | प्रतिनिधी
विराट कोहलीचो (121) 76व्या आंतरराष्ट्रीय शेंकडो आनी रवींद्र जडेजा (61) आनी आर आश्विन (56) हांच्या अर्द शेंकड्यां नेटार भारतान वॅस्ट इंडिजा आड चालू आशिल्ले दुसरे टॅस्टीच्या आपल्या पयल्या डावांत 438 धांवड्यो केल्यो. ते उपरांत जाप दितना वॅस्ट इंडिजान 2 विकेटी वगडावन 135 धांवड्यो केल्यात. क्रेग ब्रेथवेट 64 धांवड्यांचेर खेळटालो.
मजगतीं, कोहलीन आपलो शेंकडो पुर्ण केल्या उपरांत रवींद्र जडेजान 105 बॉलांनी आपलो अर्द शेंकडो पुर्ण केलो. शेंकडो पुर्ण केल्या उपरांत कोहलीन आक्रमक बॅटींग करपाक सुरवात केली. ताणें जडेजा वांगडा रोखडीच 150 धांवड्यांची भागिदारी केली. कोहली फॉर्मांत दिसतालो. पूण, तो धांवबाद जालो. कांय उपरांत जडेजा विकेटकीपर जोशुआ डीसिल्वाक कॅच दिवन परतलो. ताणें 152 बॉलांनी 61 धांवड्यो केल्यो. हातूंत पांच चवक्यांचो आस्पाव आशिल्लो.
सातवे सुवातेर बॅटिंगेक आयिल्ल्या ईशान किशनान तीन चवके मारून आपल्या डावाक सुरवात केली. पूण, जेवणाच्या विसवा उपरांत ताचो वेग मंदावलो. अखेरेक 37 बॉलांनी 25 धांवड्यो करून जेसन होल्डराचो शिकार थारलो. जयदेव उनाडकट (7) आनी मोहम्मद सिराज (0) हांकां व्हड योगदान दिवपाक जमलें ना. पूण, तांणी आश्विनाक बरी साथ दिली. ताकाच लागून आश्विनाक टॅस्ट क्रिकेटींतलो 14 अर्द शेंकडो पुर्ण करपाक शक्य जालो.
मुकेश कुमाराच्या रुपान भारताचो निमाणो बॅट्समन मैदानांत देंवलो. ते उपरांत आश्विनान दोन चवके मारून आपलो अर्द शेकडो पुर्ण केलो. तिसऱ्या बॉलाचेरूय चवको मारपाच्या यत्नां रोचाचो शिकार थारलो. आश्विनान 78 बॉलांनी चार चवक्यांचे मजतीन 56 धांवड्यो केल्यो. विंडिजा वतीन रोच आनी जोमेल वारकिन हांणी तीन-तीन विकेटी घेतल्यो. होल्डरान दोन आनी गाब्रिएलान एक विकेट मेळयली.
———
भारतान धांवड्यांचो दोंगर उबारलो आसलो तरी वॅस्ट इंडिजाचे बॅट्समन विचलीत जाले ना. दुसऱ्या दिसाचो खेळ सोंप मेरेन तो बरे स्थितींत आशिल्लो. मुखेली क्रेग ब्रेथवेट आनी तेजनारायण चंद्रपॉल हांणी पयले विकेटी खातीर 71 धांवड्यांची भागिदारी केली. पूण, चंद्रपॉलान जडेजाचे बॉलिंगेचेर आपलो संयम वगडायलो आनी आक्रमक बॅटींग करपाच्या यत्नांत आश्विनाक कॅच दिली. ताणें 95 बॉलांनी 33 धांवड्यो केल्यो.
काल तिसऱ्या दिसा अखेरची बातमी मेळ्ळी ते मेरेन विंडिजान 2 विकेटी वगडावन 139 धांवड्यो केल्ल्यो. दुसऱ्या दिसाचो नाबाद खेळगडो कर्क मॅकेंझी 32 धांवड्यो करून मुकेश कुमाराच्या बॉलाचेर बाद जालो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
