भांगरभूंय | प्रतिनिधी
वॅस्ट इंडीज पंगडान हांगाच्या ट्रॅण्ट ब्रीज टॅस्टीच्या दुसऱ्या दिसा येजमान इंग्लंड पंगडाक खडेगांठ जाप दिली.
इंग्लंडाच्या पयल्या डावांत काडिल्ल्या 416 धांवड्यांचो फाटलाव करपी वॅस्ट इंडीजान जबरदस्त प्रदर्शन करतना निमाणी खबर मेळ्ळी ते मेरेन आपल्या पयल्या डावांत 5 विकेटी व्हगडावन 341 धांवड्यो केल्ल्यो. ताच्या कावेम हॉजान (120) आकर्शक शेंकडो मारलो तशेंच अॅलीस अथानाजे (82) वांगडा मेळून चवथे विकेटी खातीर 225 बॉलांनी 175 धांवड्यांची म्हत्वाची भागिदारी केली. एका वेळार वॅस्ट इंडीजान 84 धांवड्यांचेर 3 विकेटी व्हगडायिल्ल्यान पयले टॅस्टी भशेन हे मॅचींत लेगीत ताचो डाव गडगडटलो अशें दिशिल्लें. पूण, अथानाजे आनी कावेम हांणी डाव मुखार व्हेलो आनी आपल्या पंगडाक बरे स्थितींत हाडलो. ही जोडी इंग्लंडाचो मुखेली बेन स्टोक्सान फोडली. ताणें अथानाजेक बाद केलो.
ते पयलीं इंग्लंडाचो पयलो डाव 88.3 ओव्हरींनी 416चेर सोंपलो. ताच्या ऑली पोपान पयल्या दिसा 121 धांवड्यांची खेळी केल्ली. ताणें ओपन डकेटा वांगडा मेळून विंडिजाची बॉलींग फोडून काडिल्ली.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
