वाहनां वेली जीएसटी कपातीचो सामान्य लोकांनी लाव घेवचोः मुख्यमंत्री

भांगरभूंय | प्रतिनिधी

डॉ. प्रमोद सांवत हस्तुकीं गोवा ऑटो शॉचें उक्तावण

पणजीः वाहनां वेली जीएसटी उणीं करून सामान्य लोकांक थाकाय दिल्या. हे कपातीक लागून सामान्य गोंयकारांक दुचाकी आनी चारचाकी परवडपी दरांत घेवंक मेळटल्यो. देखून गोंयकारांनी गोंय ऑटो शॉ येवन पळोवचो असो उलो मुख्यमंत्री डॉ. प्रमोद सावंत हांणी मारलाे.

विवीध चारचाकी तशेंच दुचाकी गाडयो आनी हायब्रीड वाहनांचें प्रदर्शन घडोवन हाडपा खातीर गोवा ऑटो शॉचे कला अकादमीच्या दर्यासंगमार आयोजन जालें. ह्या प्रदर्शनाचें उक्तावण केले उपरांत मुख्यमंत्री डॉ. प्रमोद सावंत उलयताले. ह्या वेळार येरादारी मंत्री माॅवीन गुदिन्हो, येरादारी खात्याचे संचालक परिमल अभिषेक हाजीर आसले.

वाहना वेली जीएसटी 28 टक्के कमी करून 18 टक्के मेरेन केल्या आनी ही कपात समान्य लोकांक थाकाय दिवपी आसा, अशें मुख्यमंत्री डॉ. प्रमोद सावंत हांणी म्हणलें.

दुचाकी आनी चारचाकी घेवपा खातीर सामान्य मनशांक हो लाव मेळटलो. देखून खूबश्या लोकांनी येवन गोंय ऑटो शो येवन पळोवचो. ह्या प्रदर्शनांत खूब बऱ्यो मोटारी आसात आनी ह्या प्रदर्शनांत उणें जाल्ल्या जिएसटीचो लाव सगल्यांनी घेवचो असो उलो मुख्यमंत्र्यांनी मारलो.

गोंय हें गतीशिलतेचे फुडार, विस्वास आनी दिश्टीकोणा खातीर तयार आसा हें गोवा ऑटो शॉ दाखोवन दिता. गोंय फक्त हें पर्यटन थळ अशें पळय नासतना नाविन्य, हरीत तंत्रगिन्यान आनी फुडारपण करपी उद्देगाचे थळ म्हूण दिसपाक लागतलें. गोवा ऑटो शॉ प्रदर्शनाचें उक्तावण करून गोंय हें फुडारपण करपाक तयार आसा असो स्पश्ट संदेश दिला अशें मुख्यमंत्र्यांनी म्हणलें.

ह्या प्रदर्शनांत वेगळ्या वेगळ्या मोटारी कंपनींच्यो इव्ही, डिझॅल, पेत्रोल आनी हायब्रीड गाडयांचें प्रदर्शन मांडलां. मुख्यमंत्री आनी येरादारी मंत्र्यान दरेक स्टोलाचेर वचून गाडयां विशीं म्हायती घेतली. तशेंच इव्ही दुचाकी आनी पेत्रोल दुचाकी इव्ही कशी करपी कंपनी प्रदर्शनांत वांटेकार जाल्ली.

ह्या प्रदर्शनांत पेत्रोल आनी बॅटरी दोनूय इंधनाचेर चलपी लेक्सस एलक्स 5 हे 5 कोटी किंमतीच्या लक्झरी गाडयेन एन्ट्री मारली. जाल्यार मुख्यमंत्री डॉ. प्रमोद सावंत हांचे हस्तुकीं सुझुकी इन्व्हिक्टो हे गाडयेचें गोंयांत लॉन्चींग जालें.