भांगरभूंय | प्रतिनिधी
स्वताचें घर आसचें, अशें सगल्यांकूच दिसता. पूण घराचें सपन आयज साकार जावप, दिसता तितलें सोंपें ना. फ्लॅटांचें मोलूय 50 लाखां वयर पावलां. ह्या घराक वास्तुशास्त्र लागता. गोंयांत पसून कांय जाण तातूंत करियर करपाक लागल्यात. आयज वाचुंया एका आॅनलायन वर्गा विशीं. तो घेवपी आसा बारामती- पुण्याचो. तो मुंबय येत्या 15 सप्टेंबराक वर्ग घेतलो. ताचें नांव जावन आसा, अजिंक्य पाटील. आदल्या काळार संडासाची वेवस्था घरा भायर आसतली. आतां ती घरांतूच जाल्या. कांय कडेन ताचे कुशीक वा एक मजली घर आसल्यार ताचे वयर संडास आसता. कितें करचें तें कांयच समजना. तेन्ना वास्तुशास्त्र तुमचे मजतीक येवं शकता. अजिंक्य हे बाबतींत तुमकां मजत करपाक शकता. घराचें दार खंय आसचें, लिव्हिंग रुम, बेडरुम, रांदची कूड खंय आसची, तें तो सांगता. देवाची कूड आनी संडास ताचे पसून कितले पयस आसचो तेंय सांगता. ह्या सगल्यांचो तुमी घर बांदचे पयलीं विचार केलो जाल्यार तुमी वास्तूदोश पयस करूंक शकतात. तशें केल्यार तुमची भलायकी बरी उरपाक शकता, अशें अजिंक्य सांगता.
अजिंक्य हो इंजिनियर. मात लोकां खातीर कितें तरी करपाक जाय, अशें ताच्या मनांत आशिल्लें. ह्याच वेळार ताका आदले राष्ट्रपती डाॅ. ए. पी. जे. कलाम हांचें एक भाशण आयकुपाक मेळ्ळें. त्या खिणाक ताका कितें करपाचें तें कळ्ळें. ताणें वास्तूशास्त्र हो विशय हाताळपाचो थारायलो. तो सिव्हील इंजिनियरींग करतालो, हाचो लाव ताका जालो. घर बांदपाक सोदपी लोकां वांगडा ताचो संपर्क येतालो. हाचो लाव घेवन ताणें वास्तुशास्त्राचें एकेक पावल मारपाक सुरवात केली. ताचे बाबा नामनेचे दोतोर. तांणी सांगले की तूं वेवस्थीत कोर्स कर, मार्गदर्शन घे. मागीर ते कर. हें आयकून अजिंक्यान कोर्स पुराय करून वास्तुशास्त्राचेर मेळटा तें साहित्य वाचलें. मार्गदर्शन घेवपाक सुरवात केली. तांकां एक दीस सानिका भोकरीकर हांणी काडिल्लो कलास्कोप दिवाळी अंक पडलो. तो वाचून तांकां एकदम बरें दिसलें. हातूंत वास्तूशास्त्राचें सगल्या आंगांनी केल्ले विचार वाचूंक मेळ्ळे. ह्या शास्त्राक धरून घर बांदलें जाल्यार तातूंत रावपी लोक सदांच आनंदी, समाधादनी जावंक शकतात, ह्या मताचेर अजिंक्य आयलो. त्या दिसा सावनूच तो वास्तुशास्त्रचेर मार्गदर्शन करपाक लागलो.
घर खंयचे दिशेक आसचें हें वास्तुशास्त्रांतल्यान कळटा, अशें अजिंक्य पाटील सांगतात. ह्या विशयांत तुमी करियर करूं शकतात. मागीर तुमकां मार्गदर्शक म्हूण काम करपाक मेळटा. आयज सगले वास्तूशास्त्र पळोवनूच घर बांदतात. घर अमूक दिशेक बांदले उपरांत भितर रावपी मनशाक समाधान मेळटा. खेरीज सकारात्मक ऊर्जा मेळटा. दर दिसा कोण घर बांदिनात. तुमी सल्लागार म्हूण काम करूं शकतात. खाजगी पांवड्याचेर तुमी पळयलां आसतलेंच की व्हडल्यो संस्था, कंपनी नव्यो- नव्यो सुवातो घेत आसतात. तांचें बांदकाम कशें आसचें, हें तुमी तांकां सांगूं शकतात. जेणेकरून ही वास्तू ताका येश दितली. हें एकदां कळत जाल्यार मागीर हुस्को ना. हातूंत तुमकां बरोच अभ्यास करचो पडटलो. तशेंच तुमकां संयमूय जाय. उलोवप गोड आसपाक जाय. कारण गिरायक कसल्या सभावाचें मेळत तें सांगपाक येना. ताचो मूड कसो आसत ते सांगपाक येना. चडशे फावटी जोडपें सल्लो घेवपाक येता, तेन्ना ती परिस्थिती वेवस्थीत हाताळूंक जाय. संवसाराचो नेम आसा की बरें जालें तें तुज्या मार्गदर्शना खातीर न्हय, तर म्हजे खातीर. अशें मानपी आसात ते आदींच मतींत धरपाचें. तुमचे भितर आत्मविस्वासाची गरज आसता. तो ना जाल्यार गिरायक कितें तें समजतलो आनी फुडले फावट तुमचे कचेरेंत येवचें ना.
वास्तुशास्त्रांत करपा सारकें खूब आसा. पूण एकलव्या सारको अभ्यास गरजेचो.
डाॅ. रामदास केळकार
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
