भांगरभूंय | प्रतिनिधी
नकारात्मक राजकारणाचो आनीक एक घातक पैलू म्हणल्यार सेगीत दुबाव आनी अस्थिरताय निर्माण करप.
भारतीय राजकारण आयज निर्णायक मोडणार उबें आसा. मतदार फक्त घोशणा, भावनीक आवाहनां वा सत्ता विरोधी घोशणांचेर निर्णय घेवपी उरिल्लें ना. काँग्रेस फुडारी राहुल गांधी हांणी ताचो केन्ना विचार केलो ना वा ते ताचे परस आनीक कितेंय चड करूंक शकतले अशें दिसपा सारकी परिस्थितीय ना. मतदार आतां प्रत्यक्ष कामगिरी पळयता, परिणाम मेजता आनी आपल्या फुडारा खातीर ठोस अशी दिशा दिवपी फुडारपणाक पसंती दिता हें मान्य करचेंच पडटलें. अशा वेळार प्रधानमंत्री नरेंद्र मोदी हांणी काँग्रेसी विशीं काल पयरूच आसाम भेटी वेळार केल्लें विधान खूब वेगळें आसा अशें म्हणूंक येवचें ना. ‘नकारात्मक राजकारणाक लागून काँग्रेसीन जनतेचो विस्वास व्हगडायला’ हें तांचे फक्त प्रचारकी भाशण नासून, बदलिल्ल्या भारतीय राजकारणाचें नेमकें वर्णन थारता.
काँग्रेस हो पक्ष स्वातंत्र्य लढ्याचो वारसो सांगता, हें निर्विवाद आसा. पूण वारसो सांगप आनी वर्तमानांत फुडारपण करप ह्यो दोन वेगळ्यो वेगळ्यो गजाली आसात. स्वातंत्र्या उपरांतच्या दीर्घ सत्ता काळांत काँग्रेसींत सत्तेचो अहंकार, घराणेशायेची पकड आनी निर्णय प्रक्रियेंतली अलिप्तताय वाडत गेली. लोकां कडेन आशिल्ले थेट नातें ल्हवू ल्हवू तुटत गेलें. जेन्ना सत्ता हातांतल्यान गेली, तेन्ना आत्मपरिक्षणा बदला काँग्रेसीन सत्ताधाऱ्यां आड सेगीत नकारात्मक प्रचार करपाचो सोंपो मार्ग स्विकारलो आनी सेगीत लोकांनी वा मतदारांनी म्हणात, तांच्या नकारात्मक राजकारणाक प्रतिसाद दिलो ना, तरिपूण ते मार्ग सोडपाचो विचार तांणी केन्ना केलो ना. 2014 उपरांतच्या राजकारणांत काँग्रेसीची भुमिका मुखेलपणान प्रतिक्रियात्मक उरली. सरकार जें जें कितें करता ताका फक्त विरोध आनी विरोधकूच करप, येवजण्यांचेर प्रस्नचिन्नां लावप, निर्णयां फाटलो हेतू दुबावाचो थारावपाचो. मागीर ते कितलेय लोकां खातीरचे आसूं, ही एक साचेबद्ध पद्दत जाल्या. विरोधी पक्षाची भुमिका टिका करपाचीच आसता, हें मान्य. पूण ही टिका जेन्ना तथ्यां बदला दुबावाचेर आनी पर्यायां बदला आरोपांचेर आदारीत आसता, तेन्ना तिची विस्वासार्हता सोंपता. काँग्रेस ह्याच सांपळ्यांत आडकल्या.
नकारात्मक राजकारणाचो सगल्यांत मोटो दुश्परिणाम म्हणल्यार लोकांचो विस्वास सोंपप. जेन्ना एखादो पक्ष सेगीत ‘देश धोक्यांत आसा’, ‘लोकशाय सोंपत चल्ल्या’, ‘सगलें कितें चुकीचेंच चल्लां’ अशें म्हणत रावता, तेन्ना सामान्य नागरिकाच्या मनांत प्रस्न उबो रावता. जर सगलेंच चुकीचें आसा, जाल्यार हो पक्ष योग्य आनीक कितें करतलो? काँग्रेसी कडल्यान ह्या प्रस्नाचे ठोस अशी, सातत्यपूर्ण जाप केन्नाच मेळ्ळी ना. संसदेच्या सभाघरांतूय ना आनी सभाघरा भायरूय ना. आयचो मतदार फक्त भाशणांचेर ना, जाल्यार अणभवांचेर निर्णय घेता. रस्ते, रेल्वे, विमानतळ, वीज पुरवण, डिजिटल सेवा, थेट लाव येवजण, प्रत्यक्ष दोळ्यांक दिसपी विकास ह्या सगल्याचो ताका दीसपट्टे जिणेंत अणभव येता. सत्ताधारी पक्षान ह्या कामगिरीचे आक्रमकपणान सादरीकरण केलां. ताचे तुळेन काँग्रेसीन खूबशे फावटी ह्या विकासकामांक सरसकट न्हयकारपाची भुमिका घेतल्या. ‘हें आदींच थारिल्लें’, हातूंत कांयच नवें ना’ ‘ही फक्त जायरातबाजी आसा’ अशी प्रतिक्रिया मतदाराक नकारात्मक आनी पळवाटो दिसप सहाजिकूच आसता.
नकारात्मक राजकारणाचो आनीक एक घातक पैलू म्हणल्यार सेगीत दुबाव आनी अस्थिरताय निर्माण करप. घटनात्मक संस्था, वेंचणूक प्रक्रिया, न्यायवेवस्था वा प्रशासन हांचेर सेगीत अविस्वास दाखोवप हें लोकशाये खातीर घातक थारता. थोड्याश्या राजकी फायद्या खातीर हें करीत आसत जाल्यार सामान्य नागरिकाक सेगीतचो संघार्श नाका आसता. ताका स्थैर्य, सुरक्षीतताय आनी फुडारांतली स्पश्ट दिशा जाय आसता. काँग्रेसीची भाशा मात खूबशे फावटी अस्वस्थताय वाडोवपी थारल्या. काँग्रेसीच्या अधोगती फाटल्यान तिच्या अंतर्गत संघटणात्मक अपेसाची व्हड भुमिका आसा. निर्णय कांय मेजक्याच लोकां पुरते मर्यादीत उरप, थळाव्या फुडारपणाचेर विस्वास न दवरप, कार्यकर्त्यांक सत्ता केंद्रां पसून पयस दवरप, हाका लागून पक्षाची तळागाळांतली शक्त सोंपत गेली. खूबश्या राज्यांनी सक्षम फुडारी आसून लेगीत तांकां स्वतंत्रपणान काम करपाची मेकळीक मेळ्ळी ना. परिणाम, वेंचणुकांच्या वेळार काँग्रेसी कडेन फक्त घोशणांची ताकद उरली, संघटणात्मक यंत्रणा ना. हाचें उरफाटें, सरकार पक्षान बूथ पांवड्या मेरेन संघटण उबारलें, सेगीत लोकसंपर्क दवरलो आनी आपल्या कार्यकर्त्यांक निर्णय प्रक्रियेचो भाग केलो. मतदाराक ही ऊर्जा, ही सातत्या स्पश्टपणान जाणवली. राजकारणांत फक्त विचारधारा न्हय, जाल्यार अंमलबजावणी आनी उपस्थितीय म्हत्वाची आसता हेंच नेमकें राहुल गांधी हांचो काँग्रेस पक्ष विसरलो.
प्रधानमंत्री नरेंद्र मोदी हांची राजकी मांडणी ही स्पश्टपणान सकारात्मक विचारांचेर, कथानकाचेर आदारिल्ली आसा. ते विकास, राष्ट्रीय अस्मिताय, आत्मनिर्भरताय आनी दीर्घकालीन उद्दिश्टांचेर भर दितात. विरोधकांचे टिकेक ते ‘नकारात्मक मानसीकता’ म्हणून मांडटात आनी स्वताक ‘काम करपी पर्याय’ म्हूण सादर करतात. काँग्रेसीन ह्या कथानकाक धारेच्या, तथ्याक धरून आनी लोकांक पटत अशी जाप दिवप अपेक्षीत आशिल्ली. पूण ताचे बदला वैयक्तीक टिका, उपरोधीक टिप्पणी आनी सेगीतची कुरकूर होच मार्ग स्विकारलो. हाचो सगल्यांत चड फटको तरणाट्या मतदारां कडेन आशिल्ल्या नात्याक बसलो. आयचो तरणाटो आशावादी आसा, संदी सोदपी आसा आनी फुडारांतले सुरक्षीततायेचो विचार करपी आसा. ताका फक्त सरकारा आडच्या घोशणां परस रोजगार, कुशळटाय विकास, उद्देजकता आनी स्थैर्य ही भाशा चड भावना. काँग्रेसी कडल्यान ही सकारात्मक, दूरदिश्टीची भाशा प्रभावीपणान येवंक शकली ना.
काँग्रेसी खातीर सगलें सोंपले अशें आतांच म्हणप घाईचे थारतलें. महाराष्ट्रांतल्या म्हापालिका वेंचणुकेच्या निकालांतूय हो पक्ष खूब सकयल गेलो हें मान्य करून लेगीत ह्या पक्षा कडेन अजून लेगीत इतिहासीक वारसो, अणभवी फुडारी आनी राष्ट्रीय पांवड्यार वळख आसा हें विसरूंक येवचें ना. पूण ह्या भांडवलाचो उपेग करपा खातीर नकारात्मक राजकारणाची संवय पयलीं तांकां सोडची पडटली. फक्त सत्ताधाऱ्यां आड उबे रावप फावोशे ना; लोकां खातीर ठाेस विस्वासार्ह आनी चालीक लावंक मेळटलो अशा पर्यायांचो अजेंडा दवरचो पडटलो.
निमाणें आयच्या भारतीय राजकारणांत एक गजाल स्पश्ट आसा. नकारात्मकतायेकूय कांय मर्यादा आसात. लोकांक भिरांत दाखोवन, दुबाव निर्माण करून वा सेगीत टिका करून दीर्घकाळ सांगात मेळना. आशा, स्थैर्य आनी विकासाचो मार्ग दाखोवपी फुडारपणूच लोकांक भावता. प्रधानमंत्री नरेंद्र मोदी हांणी केल्ली टिका ही काँग्रेसी खातीर फक्त आरोप नासून शिटकावणी आसा. ती शिटकावणी वेळारूच समजून घेवन आत्मपरिक्षण जायत जाल्यारूच काँग्रेस परतून लोकां कडेन नातें जोडूंक शकतली. नाजाल्यार, नकारात्मक राजकारणाच्या वज्या खाला तिचो जनाधार आनीक नेटान खचत वतलो हें अटळ आसा.
वामन प्रभू
9823196359
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
