भांगरभूंय | प्रतिनिधी
भारतांत दर 16 मिनटांक एक बलात्कार घडटा अशें राश्ट्रीय अपराध रिकॉर्ड ब्युरोन (NCRB) आपल्या अहवालांत म्हळ्ळां. गुन्यांव लिपोवपाच्या उद्देशान कांय प्रकरणांत खून जातात. हाय प्रोफायल अर्थात उच्च श्रेणीय प्रकरणांत देशभरांतल्यान लोक रस्त्यार देंवतात. मेणवाती पेटोवन पुर्सांव काडटात. सोशल मिडीयाचेर फोग काडटात. दिल्लीच्या निर्भया कांडाचे तुळेन व्हड प्रमाणांत आक्रोश सद्या कोलकाता आर. जी कर वैजकी महाविद्यालय प्रकरणांत जाल्लो दिसता.
‘कायद्या मुखार सगळे समा आनी कायदे हे सगळ्यांक समा’ हे आमचे संविधान म्हणटा तेन्ना धर्म, जात- पात, पंथ, प्रांत, सामाजिक स्तर, राजकी पक्ष हांचो विचार जायनासतना पिडीतांक न्याय मेळप आनी गुन्यांवकारांक खास्त मेळप अपेक्षीत आसता, पूण वास्तव वेगळें दिसता.
देशांत मजूर, कारकून, अधिकारी, शिक्षक, प्राध्यापक, संशोधक, दोतोर, इंजिनियर, न्यायाधीश, वकील, उद्देजक, राजकारणी, मंत्र्यांच्या रुपड्या फाटल्यान विकृत मानसिकतेचे समाजांत वावुरतात. बलात्कारी राजकारणी, धर्म प्रसारक, साधूबाबा हे ख्यास्त जाले उपरांतूय समाजांत उजळ माथ्यान, दिमाखान वावुरतना दिसतात. तांचे कार्यकर्ते, भक्त, संप्रदायी तांच्या फाटल्यान उबे दिसतात, मात राम रहिम, आसाराम सारकेल्यांच्या पिडीतांक आनी तांच्या कुटुंबीयांक भिरांतीत जीण जगची पडटा, हें एक दुर्दैवी वास्तव. कोलकातांत आर. जे. कर हॉस्पिटलांतले घडणुकींतलो आक्रोश ताजो आसतना ख्यास्त भोगपी गुन्यांवकार आसाराम बापू आनी राम रहिम इन्सान ह्या दोगांकूय परतून एकदां सरकारांच्या कृपेन बंदखणींतल्यान रजा मेळ्ळ्या.
सरन्यायाधीश चंद्रचूड हांणी कोलकाता घडणुकेची स्वता दखल घेवन मेडीकल क्षेत्रांत कार्यरत आशिल्ल्यांक हिंसा आनी लिंगीक अत्याचारांतल्यान संरक्षण मेळचें हे दृश्टीन एक्शन प्लान थारावपा खातीर 9 दोतोर आनी देशाचे उच्च स्तरीय नोकरशाहांचो आस्पाव आशिल्लो केंद्रीय टास्क फोर्साचे गठन करपाचें थारायलां. गुन्यावकारांचेर खर कारवाय भारतीय न्याय- सुरक्षा- साक्ष संहिता अधिनियम तशेंच महिलां खातीरचे विशाखा मार्गदर्शक तत्वां, केंद्रीय सुरक्षा कायदो (सीपीए) हांचे खालाय करप शक्य आसा, पूण कार्यपालिका (पुलीस यंत्रणा आनी प्रशासन), विधीमंडळ (कायदे करपी लोक प्रतिनीधी) हे संविधानाचे दोन स्तंभ जर गुन्यांवांचो निश्पक्ष तपास करनासतना आपल्या गोपांतल्या गुन्यावकारांक वाटावपा खातीर साक्ष मिटोवपाचो यत्न करता जायत वा एफ. आय. आर दाखल करपाच्या कामांत मुद्दम कळाव करता जायत, जाल्यार नवे- नवे कायदे करून कितें साध्य जावपाचें आसा? फकत धारदार शस्त्रां आसलीं म्हूण जायना तांचो सुयोग्य वापर जावप हें चड गरजेचें.
सद्या देशांत ‘वंय शेत खाता’ अशी परिस्थिती दिसता. चलयो, महिलांचेर आगळीक करप्यांक सगळे राजनीतिक पक्ष विरोध करतात खरे, पूण वेंचणूक आवेदन प्रतिज्ञापत्रांत महिला उत्पीडनाचे आरोप लागिल्ली म्हायती दिल्ली आसतना तांकां मुखेल राजकी पक्षानीं उमेदवारी दिल्या आनी ते लोकप्रतिनिधी म्हूण वेंचून येवन कायदेमंडळाचे सभासद जाल्ले आसात. ह्या खिणाक महिला आड गुन्यांवांच्यो केशी लागिल्ले भाजपचे 54 आनी काँग्रेसचे 23 आमदार- खासदार देशाच्या कायदेमंडळांत विराजमान आसात. तांतूतले बरेचशे एका परस चड असल्या केशींनी आसात. आयज चर्चेंत आशिल्ल्या अंतस्त बंगालांत सगळ्यांत चड म्हळ्यार राजकी पक्षांचे वट्ट पंचवीशे महिलाआड गुन्यांवांचे आरोपी आमदार- खासदार आसात.
2017 वर्सा योगीचो मंत्री कुलदीप सेंगराच्या बंगल्यार चलयेचो सामुहीक बलात्कार जाल्लो तेन्ना पीडितेचो एफआयआर दाखल करून घेवपाक पुलिसांनी न्हयकार दिल्लो आनी उरफाटे तिच्या बापायक बंदखणींत उडयिल्लो. न्याया खातीर तिणें योगींच्या निवासस्थाना भायर आत्मदाहाचो यत्न केलो तेन्ना एफ. आय. आर दाखल जालो. मात तिच्या बापायक बंदखणींत बडयिल्ले कारणान मरण आयलें. मंत्री सेंगरा आड सुरवेक सरकारान कसलीच कारवाय केली नाशिल्ली. शेवटा जेन्ना कोर्टांतल्यान ती पिडीता परततना ट्रक अपघात घडोवन केल्ल्या हल्ल्यांत तिचो सोयरो दगावलो तेन्ना लोकांच्या रागा मुखार नमते घेवन ताका सरकारांतल्यान काडून उडयलो. सेंगराक दोशी थारावन खास्त जाली तरी सेंगरान वेचणुकेंत आपल्याक जैतिवंत जावपाक मजत केली म्हूण सांसद साक्षी महाराजान बंदखणींत तांची भेट घेवन उपकार मानले.
हाथरस सामुहीक बलात्कार प्रकरणांत एफआयआराची नोंद बोवाळ जाले उपरांत घडणुकेच्या 6 दीस उपरांत जाली आनी 10 दीस उपरांतूय 4 आरोपींक अटक जाली नाशिल्ली. गंभीर तरेन जखमी पिडीता सोंपले उपरांत तिची कुड तिच्या कुटुंबाच्या ताब्यांत दिनासतना योगीच्या पुलिसांनी राती अडेच वरांचेर पॅत्राॅल घालून लासली. “महिलांचो छळ करतल्यांक आमी यमसदनांत धाडटले” अशे पयर योगी आदित्यनाथान म्हणलां ताचेर कसो विश्वास दवरतले?
दिल्ली पुलिसांनी कुस्ती महासंघाचे आदले अध्यक्ष बृजभूषण सिंग हांचे आड लिंगीक उत्पीडनाचे आरोप लावपी महिला कुस्तीगीरांचो एफ. आय. आर नोंदोवन घेवपाक न्हयकार दिले उपरांत तांकां न्याय, हक्क मेळोवपा खातीर देशाच्या राजधानींत आंदोलन करचें पडलें. एफ. आय. आर नोंद करपाचो आदेश तांकां सुप्रीम कोर्टांतल्यान मेळोवचो पडलो. बेटी बचाव उरले कुशीन तांकां थंयच्यान हालोवपा खातीर रस्त्यार ओडत, बडयत तांचो पुलिसांनी जाहीरपणान केल्लो हिंसक छळ, उत्पीडन देशान, जगान पळयलें. सरन्यायधीश चंद्रचूडानूय पळयलें आसतलें, पूण दखल कित्याक घेतली ना तें कळना. एफ. आय. आर दाखल जाले उपरांतूय बृजभूषणाक अटक जाली नाशिल्ल्यान तीं परतून सुप्रीम कोर्टांत गेलीं तेन्ना कोर्टान तांकां सांगलें- “आमी एफ. आय. आराचो आदेश दिला, मुखारले काम पुलीस करतले. आमी आदेश दिवचे नात.”
महाराश्ट्रांत बदलापूरांत दोन सानुल्यांचेर आगळीक करप्याआड एफ. आय. आर दाखल करून घेवपाक पुलिसांनी वेळ काडलो. लोक रस्त्यार येवन दबाव वाडलो तेन्ना बारा वरां उपरांत तो दाखल करून घेतलो. हांगाय बाँम्बे हायकोर्टाक दखल घेवची पडली. प्रकरण पालोवन व्हरपाचो प्रकार कोलकाता आर. जी. कर हॉस्पीटल कांडात दिसलो. प्रसंग उक्तडार आयलो तेन्ना बेगोबेग पुलिसांक पाचारण करपाचें सोडून कॉलेजीचो प्राचार्य स्टाफ मिटींग आपोवन तें प्रकरण आत्महत्येचें हें पटोवन दिवपाचो यत्न करतना दिसलो. आत्महत्या करपी खंयची महिला स्वताची तकली फोडून, दोळो फोडून, गळो चेपून, हाडां मोडून, नाजूक इंद्रीयांक इजा करून अर्धनग्न स्थितींत आत्महत्या करतली? प्राध्यापकान आवय, बापायक बऱ्या उसरां कळीत केलें आनी उपरांत तांकां तीन वरां भायर उबी दवरलीं. पुलिसांक पाचारण करचे आदी पुरावे मिटोवपाचे यत्न जाल्लो आसुये हे सीबीआय सर्वोच्च न्यायालयाक सांगता. शवविच्छेदन करून तिची कुड तिच्या घरांतल्यांचे सुवादीन केले उपरांत पुलिशेंत एफआयआर दाखल केला, म्हळ्यार तो मेरेन घडणूकेक 17 वरां मायत जावन गेल्लीं. वखदांचो काळाबाजार करप, चाळीस टक्के कमिशन घेवप, बेवारशी मडीं विकप असल्या धंद्यांत प्राचार्य संदीप घोष घुस्पला आनी आरोपी संजय रॉय हो ताचो सचीव आनी बावन्सराचें काम करतालो अशें आदले कर्मचारी मुखार येवन सांगपाक लागल्यात, तेन्ना हो पड्ड्याफाटलो कट कारस्थान रचपी सुत्रधार निश्चित आसतलो आनी एकाद्रे कुकर्मांत सामील आसुये ह्या खातीर तपास यंत्रणांनी कळाव करनासतना ताका आतां मेरेन कस्टडींत घेवन ताची तपासणी करपाची गरज आशिल्ली.
सात हजारांचो जमाव रातीन साक्ष मिटोवपाच्या उद्देशान जर हॉस्पिटलाचेर हल्लो करता आनी पुलीस थंयच्यान धांवतात जाल्यार हातूंत राजकारण्यांचो हात आसा हे सिद्ध जाता, मागीर मुख्यमंत्री- गृहमंत्री ममता बलात्कारींक फाशीची मागणी करूं, फास्ट ट्रेक सुनावणीची मागणी करूं वा केंद्रा कडेन खर कायद्याची मागणी करूं. विश्वास दवरप कुस्तार जाता. हतयाचे खावपाचे आनी दाखोवपाचे दांत वेगळे आसतात, अशें म्हणटात.
बिहारच्या चंपारणांतल्या बेतिया गांवातल्या नर्सिंग शिक्षण संस्थेचो मुख्याध्यापक कामार आसतना सोरो पियेता आनी नर्सिंगाच्या विद्यार्थिनीक मसाज करपाक लायता हाची कागाळ थंय भलायकी मंत्रालय आनी मुख्यमंत्र्याक विडिओ सयत धाडिल्या. हें बरयता आसतना ताचेआड कसलीच कारवाय जाल्ली नाशिल्ली.
‘दिव्या खाला काळोख’ अशी म्हण आसा ती सुप्रीम कोर्टाकूय – तिसऱ्या स्तंभाक- लागू जाता. सरन्यायाधीश गोगोय हे आपलो लिंगीक छळ करता हाची सविस्तर तक्रार थंयच्या महिला कर्मचाऱ्यान दाखल करून ताच्यो प्रती 32 न्यायाधीशांक धाडिल्ल्यो. Nemo judex in causa sua – स्वताच्या प्रकरणात आपणे न्यायाधीश आसू नये. हो न्यायदानाचो पयलो सिद्धांत विसरून गोगोय ते केसींत स्वता पीठासीन जाल्ले.
बोवाळ जाले उपरांत दुसरें एक पीठ बसयलें खरें, पूण तांणी तिका वकील घेवपाची अनुमति दिली ना आनी तिचे आरोपूय आयकून घेतले नात. Audi alteram partem – विरोधी पक्षाचे म्हणणे आयकून घेवचे हो दुसरो मुळावो सिद्धांतूय पाळ्ळो ना. उरफाटी तिची, तिच्या घोवाची, देराचेर पाळत दवरपा खातीर पुलिसांचो वापर सरन्यायाधीश करता अशे आरोप लागिल्ले. देशांतल्या सर्वोच्च न्यायसंस्थेत न्याय जाता हे देशाक दाखोवपा खातीर खरें तर गोगोयन आपूण जावन आपल्या पदा वयल्यान कुशीन सरून चवकशी जावची म्हूण आग्रो धरपाचो. पदाची गरीमा पाळपा खातीर बाकीच्या 32 न्यायाधीशांनी – निदान न्यायधीश चंद्रचूडान- गोगोयक तशे करपाची बुद्द दिवपाची. तें जालें ना. उरफाटे निवृत्त जाले उपरांत लिंगीक गुन्यांवाचे आरोप लागिल्ल्या गोगोयक ‘बेटी बचाव’ सरकारान मानान राज्यसभेंत (विधीमंडळांत) धाडलो.
चवथो स्तंभ मिडीयाय निश्पक्ष उरिल्ले नात. पक्के राजकारणी जाल्ले दिसतात. विपक्षी घुस्पल्ल्यो घडणुको सांगतना लावड स्पीकर जावपी पत्रकार, एंकर, जेन्ना सत्तापक्षाचे आडकल्ले आसतात तेन्ना पाली कश्यो चुकचुकतना दिसतात.
दीपक लाड
पर्वरी
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
