भांगरभूंय | प्रतिनिधी
भांगरभूंय । प्रतिनिधी
मुरगांवः जीसुडा वतीन वास्को हांगा मुरगांव पालिका मंडळाचे पयलीच्या मार्केटाचें नूतनीकरण करून लेगीत थंय गिरायक येना देखून वेपारी संकश्टांत पडल्यात. ह्या मार्केटांतल्या वेपाऱ्यांचो विशय गंभीरपणान घेवंन शारांत वेगवेगळे कडेन रस्त्यार आनी फुटपाथांचेर वेवसाय करपी विक्रेत्यांक ह्या नूतनीकरण केल्ल्या मार्केटांत हाडपा खातीर पालिका मंडळान फुडाकार घेवचो अशी मागणी जाता.
जीसुडा वतीन लाखांनी रुपया खर्च करून मार्केटाचें नूतनीकरण केलां. ह्या मार्केटांत विक्रेते आयले पूण गिरायक नाशिल्ल्यान तांचें अर्थीक लुकसाण जाता. कांय जाणांनी रस्त्यार आनी फुटपाथाचेर वेवसाय परत सुरू केला. मार्केटांत गोयांत पिकयल्ली भाजी आनी फळां आनी रांदपाक लागपी वस्तु मेळटात. मात गिरायक ह्या मार्केटा कडेन येनाशिल्ल्यान प्रश्न उप्रासल्यात.
सध्या ह्या मार्केटांत तीन ते चार ज्येश्ठ बायलो आपलो वेवसाय कसो तरी चलयतना दिश्टी पडटात. मुरगांव पालिका मंडळान रस्तो आनी फुटपाथांचेर विक्री करपाक बंदी घालून थंय वेवसाय करतात तांकां सुडा मार्केटांत हाडपाची कारवाय करची अशी गिरायक मेळनाशिल्ल्या विक्रेत्यांनी मागणी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
