भांगरभूंय | प्रतिनिधी
वास्को : मंगळारा 15 एप्रीलाक वास्को रेल्वे स्टेशनाचेर सांपडिल्ली रुप्याची सत्री कारवारच्या साईबाबा देवळांतल्यान चोरिल्ल्याचें मुखार आयलां. कारवार पुलिसांनी बुधवारा 16 एप्रीलाक वास्को येवन ती सत्री कायदेशीर सोपस्करा उपरांत ताब्यांत घेतली, अशें वास्को रेल्वे पुलीस स्टेशनाचे निरिक्षक आनंद शिरोडकार हांणी सांगलें.
मंगळारा 15 एप्रीलाक सांजेच्या 5.30 वरांच्या सुमाराक वास्को रेल्वे पुलीस आनी रेल्वे प्रोटेक्शन फोर्साचे जवान रेल्वे प्लॅटफॉर्माचेर गस्त घालतना तांकां एका तांबड्या रंगाची बॅग बेवारस स्थितींत सांपडिल्ली. तांणी ती ताब्यांत घेवन तपासणी केली तेन्ना तांकां भितर चादरींत गुठलायिल्ली धव्या धातूची एक वस्तू सांपडली.
ह्या प्रकरणांत थळाव्या सराफाक हाडून ताचे वरवीं ते वस्तूची तपासणी केली. तपासणे उपरांत ती वस्तू रुप्याची सत्री आशिल्ल्याचें स्पश्ट जालें. हे सत्रीचें वजन 6.4 कील आशिल्लें. 87.50 टक्के शुद्धताय आशिल्ले ते सत्रीचें मोल सुमार 5 लाख 37 हजार 600 रुपया आसा. ही सत्री कारवारच्या साईबाबा देवळांत जाल्ले चोरयेंतल्या वस्तूंतली एक आशिल्ल्याचें उक्तडार आयलें. चोरांनी त्या देवळांतल्यो 16 कील वजनाच्यो रुप्याच्यो वस्तू चोरिल्ल्यो. ते उपरांत ते घडये वास्को आयिल्ले आसतले. वास्को रेल्वे स्टेशनाचेर पुलीस गस्त पळोवन तांणी रुप्याची सत्री आशिल्ली बॅग प्लॅटफॉर्मार उडोवन थंयच्यान पळ काडिल्लो आसतलो, अशी शक्यताय उक्तायतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
