वास्को सप्ता काळांत सर्वीस रस्ते उक्ते

भांगरभूंय | प्रतिनिधी

नगराध्यक्षः डिसेंबर मेरेन उड्डाण पूल येरादारी खातीर उक्तो

भांगरभूंय । प्रतिनिधी

वास्कोः वास्को सप्ता काळांत वास्को पुलीस स्टेशना मुखार वयल्या उड्डाण पुला पोंदचो सर्वीस रस्तो उक्तो करतले. ताका लागून एफ. एम. गोम्स मार्गा वयली येरादारी ह्या रस्त्या वयल्यान वतली. ताका लागून येरादारीची समस्या उप्रासची ना. स्वातंत्र्य पथाचेर दोनूय वटांनी फर्निचर विक्रेत्यांची वेवस्था वास्को सप्ता काळांत करतात. ताका लागून तो मार्ग येरादारी खातीर आडखळीचो थारतलो. हे खातीर सर्वीस रस्त्याचो वापर करपाचो निर्णय घेतला, अशें मुरगांवचे नगराध्यक्ष गिरीष बोरकार हांणी सांगलें.

ह्या उड्डाण पुलाच्या बांदकामा संबंदांत आमदार साळकार हांणी पळोवणी केली. ह्या वेळार तांचे वांगडा मुरगांवचे नगराध्यक्ष गिरीष बोरकार, येरादारी येरादारी निरिक्षक शैलेंद्र नार्वेंकार, गॅमन इंडिया कंपनीचे अधिकारी दीपक बांदेकार आनी हेर मानेस्त हाजीर आशिल्ले.

वास्को पुलीस स्टेशना मुखा वयल्या नियोजीत अप रॅम्प पुलाचें 90 टक्के बांदकाम पुराय जाल्ल्यान तो डिसेंबर मेरेन उक्तो जातलो. हो उड्डाण पूल वास्कोकारां खातीर खूब म्हत्वाचो आसा. टिका करप्यांनी ह्या उड्डाण पुलाक भेट दिवन पळोवणी करची, अशें वास्कोचे आमदार कृष्णा साळकार हांणी सांगलें.

साळकार हांणी चलिल्ल्या बांदकामा संबंदांत समाधान उक्तायलें, तशेंच मुख्यमंत्री डॉ. प्रमोद सावंत हांणी दिल्ल्या आदारा खातीर तांचे उपकार मानले.

ह्या उड्डाण पुलाच्या बांदकामा आदीं खूब जाणांनी टिका केल्ली. ह्या उड्डाण पुलाची गरज ना, अशें तांचें म्हणणें आशिल्लें. पूण हो पूल कितलो म्हत्वाचो आसा, हें पुला वयली येरादारी सुरू जाले उपरांत तांच्या लक्षांत येतली. ह्या उड्डाण पुला पोंदच्या सर्वीस रस्त्याची दोनूय वटांतली रुंदी 4 मिटर आशिल्ली, पूण गॅमन इंडिया कंपनीन योग्य आराखडो करून ती स मिटर मेरेन वाडयल्या. ताका लागून सडा, बोगदा, बायणा वटेन वचपी वाहन चालकांक पुला पोंदच्या रस्त्यांचो वापर करपाक मेळटलो. ह्या रस्त्यांच्या दोनूय वटांनी गटार, फुटपाथाची सुविधा आसा. ह्या उड्डाण पुला पासून राष्ट्रीय म्हामार्ग लागींच आसा. ताका लागून वास्कोच्यान मडगांव, तशेंच सडा, बोगदा वाठारांत वचप्यां खातीर तो म्हत्वाचो थारतलो, अशी म्हायती आमदार साळकार हांणी दिली.

उड्डाण पुलाक लागून वास्कोचे येरादारी वेवस्थेंत कसलेच बदल जावचे नात. ताका लागून फुडारांत कसलीच आडखळ निर्माण जावची ना. वास्कोच्यान मडगांव, पणजे वचपा खातीर व्हड गाडयां खातीर चिखली मार्ग हो एकूच रस्तो आशिल्लो. ताका लागून काय आडखळी निर्माण जाताल्यो. आतां उड्डाण पूल उक्तो जावपाचो आशिल्ल्यान ही आडखळ पयस जातली. ह्या पुला वयल्लयान येरादारी सुरू जाले उपरांत शारांतली येरादारीची कोंयडी उणी जावपाक मजत जातली, अशें साळकार हांणी सांगलें.

येता त्या काळांत वास्कोचें रूप बदलतलें. वास्को कदंब बस स्टॅण्डा संबंदांत निमाण्या पांवड्याचेर उलोवणी चल्ल्या. केंद्रीय मंत्री नितीन गडकरी गोंयांत आयले उपरांत तांचे कडेन ह्या प्रकरणांत चर्चा करतले. शांतीनगर- मांगोरहील वाठारांत पार्कींग बे करचे खातीर आमी हालचाली सुरू केल्यात. सेंट अँड्र्यू चर्च चौकांतलो रस्तो रूंद करपाचें काम हातांत घेतले. थंयचो रस्तो सुमार चार मिटर रूंद जातलो. ताका लागून येरादारी सुरळीत जावपाक मजत जातली, अशें तांणी स्पश्ट केलें. अधिकारी बांदेकार हांणी हो उड्डाण पूल नोव्हेंबर- डिसेंबर मेरेन येरादारी खातीर उक्तो जातलो, अशें स्पश्ट केलें. आतां पावसाळो चालू आशिल्ल्यान थंय म्हत्वाचें काम करपाक मेळचें ना. वास्को सप्ता खातीर पुला पोंदचे दोनूय सर्वीस रस्ते येरादारी खातीर उक्ते करतले अशें तांणी सांगलें.