भांगरभूंय | प्रतिनिधी
पेडणे तें काणकोण मेरेन उत्सवाच्या महासागरान भरिल्ले गोंय दरवर्सा श्रावणाच्या पवित्र म्हयन्याची वाट पळयता. दरेक भक्त आपले देवतेची सेवा आनी उत्सव मनोवपाक भोव उमळशीकेन तयारेक लागता. जात्रा वा फेस्तां… दरेका उत्सवाची आपली अशी अमूक आख्यायिका वा फाटभूंय आसता. ग्राम देवतेचो उत्सव म्हणजे सगळेच कडेन खोशयेचो परमळ. श्रावणाचो पयलो सण नागपंचम जाली. आतां वास्कोकारांची ग्रामदेवता श्री दामबाबाच्या सप्तकाक लोकांची गर्दी भरतली. सप्ताची सुरवात खंयच्या वर्सां जाली आनी ताच्या फाटली अख्यायिका तुमका सगळ्यांक खबर आसतली. देवळा सरभोंवतणी भरपी फेरी तर दरेकाचें लक्ष ओडून घेतां. पूण आयज विशय सप्तकाक एका वेगळ्या पांवड्यार पावोवपी वांगडी आनी कलाकारांचो. तांची तोखणाय करप तितलेंच म्हत्वाचें. फाटल्या दोन वर्सां सावन वास्को सप्तका निमतान आमका एक आगळो वेगळो प्रयोग पळोवंक मेळटा. अंदूं लेगीत आमकां हाचो आस्वाद घेवंक मेळटलो.
वास्कोचो रोटरॅक्ट क्लब, रोटरी क्लब आनी सम्राट क्लबान खासा दामोदर सप्ता निमतान 23 ऑगस्ट मेरेन सकाळीं 10 ते रातीं 9 मेरेन ‘1930 वास्को’ हांगां ‘सप्ताहाची चित्रकथा’ हें वास्को सप्तकाचें खाशेलेंपण दाखोवपी पेंटिंग प्रदर्शनाचो आस्वाद रसिकांक घेवंक मेळटलो. हांगा ल्हान भुरगीं धरून तरणाट्या कलाकारांनी रंगयल्ली वट्ट 20 सोबीत पेंटिंग्स पळयताच मन प्रसन्न जाता.
काळजांत दामबाबा खातीर आशिल्लो मोग आनी भक्ती कलेच्या रूपांत साकारताना त्या कलाकारांची मेहनत खरेंच नखेत्रां वरी चकचकता. दरेक पेंटिंग दामबाबाच्या सासायेची वेगळी आनी नवी काणी लोकांक सांगता. चित्र पळोवपाक जितलें सुंदर दिसता तितलेंच ताका रंगोवपाक कश्ट घेवचे पडटात.
सप्ताका निमतान दामबाबाच्या दर्शनाक येवपी दरेका भक्तान हाचो आस्वाद घेवचो. कलाकारांची तोखणाय करून तांची उर्बा वाडोवची आनी अशेच नवीन कलाकार घडचे. फकत अंदूंच न्हय तर दरवर्सां असो नवीन प्रयोग जायत रावचो.
विष्णू नार्वेंकार
7709868431
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
