वास्को सप्तां उत्सवाचे तयारी विशीं उपजिल्होधिकाऱ्याची नियाळ बसका

भांगरभूंय | प्रतिनिधी

वास्कोः मुरगांवची उपजिल्होधिकारी स्नेहल प्रभू हांचे अध्यक्षते खाला 3 ऑगस्टाक जावपी वास्को सप्ता उत्सवाचे तयारी संबंदांत पुनर्नियाळ घेवपी बसका जाली. हे बसकेंत थळावें प्रशासन अधिकाऱ्यांनी विवीध म्हत्वांच्या विशयांचेर चर्चा केली. तयारी खंय मेरेन पावल्या, कायदो आनी सुवेवस्थे विशां कसली उपाय येवजण केल्या, येरादारी आनी हेर गजालींची संबंदितांनी म्हायती दिली.

हे बसकेक वास्काचे आमदार कृष्णा साळकार, नगरसेविका शमी साळकार, नगरसेवक दीपक नायक, दामोदर भजनी उत्सव समितीचे अध्यक्ष कृष्णा सोनुर्लेकार, विनायक घोंगे, नगरसेवक दीपक नायक, उपनगराध्यक्ष अमेय चोपडेंकार, पुलीस निरिक्षक कपील नायक, येरादारी पुलीस निरिक्षक शैलेश नार्वेकार तशेंच वीज, उदक, रस्ते, उजो पालोवपी दळ, पालिका हांचे प्रतिनिधी हाजीर आशिल्ले.

सप्ता उत्सवाच्या काळांत स्वातंत्र्य पथाचेर फेरी मांडटात. ताका लागून हो रस्तो येरादारी खातीर पुराय बंद दवरतात. ताका लागून एफ. एल. गोम्स रस्त्याचेर ताण येता. येरादारी वेवस्थे संबंदांत योग्य नियोजन करचे संबंदांत चर्चा केली. सप्ता काळांतले पयले दोन- तीन दीस अवजड वाहनां दाबोळी विमानतळ मार्गान वरुणापुरी, बायणा उड्डाण पूल, सडा, मुरगांव बंदर अशी वळयतले. भाविकांच्या गाडयांक लागून पार्किंगेचो प्रस्न उप्रासचो न्हय, हे खातीर चारचाकी गाडयो तानिया हॉटेला मुखा वयल्या मेकळ्या मैदानाचेर उबी करतले, अशें शैलेश नार्वेकार हांणी सांगलें.

पुलीस निरिक्षक नायक हांणी कायदो आनी सुवेवस्थे संबंदांत म्हायती दिली. कायदो आनी सुवेवस्ता वेवस्थीतपणान हाताळपाक मेळची हे खातीर दक्षीण गोंयांतल्या विवीध पुलीस स्टेशनांतलो पुलीस फौजफांटो वास्को सप्ताच्या काळांत तैनात करतले. कोरानाक लागून दोन वर्सां वास्को सप्ता भौशीक तरेन मनोवंक नाशिल्लो. ताका लागून अंदूं भौशीक तरेन मनोवपी ह्या सप्ता उत्सवांत व्हड गर्दी जावपाची शक्यताय आसा. मात भाविकांनी सप्ता उत्सवांत वांटो घेतना कोरोना मार्गदर्शक तत्वांक पाळो दिवपाची गरज आसा, अशें नायक हांणी सांगलें.

दामोदर देवळा लागसारच्या कोसंबी इमारतीच्या तळमाळ्याचेर तात्पुरतें पुलीस आवट पोस्ट उबारतले. कसलीच वायट घडणूक घडची न्हय हे खातीर धा टेहाळणी मनोरे उबारतले. महिला आनी दादले हांच्यो दरेकी एक अश्यो दोन बटालियन तैनात करतले. तशेंच ह्या सगळ्या गजालींचेर दक्षीण गोंयांतले उपअधिक्षक नदर दवरतले, अशें नायक हांणी स्पश्ट केलें. अंदूंचो सप्ता उत्सव प्लास्टीक मुक्त करपाचो निर्धार केला. फेरयेंतले कांय विक्रेते प्लास्टीक पोतयांचो उपेग करतात. पालिका तांचेर कारवाय करतली. कारवाय करून लेगीत ते आयकना जाले जाल्यार ताच्या दुकानाक सील मारतले. पार्किंगेक लागून भाविकांची गैरसोय जावची न्हय हे खातीर आमी यत्न करतात. हिंदुस्थान पॅट्रॉलियमान सुमार 9 हजार चौखण मिटर सुवात रिती केल्ल्यान थंय गाडयो पार्क करपाक दिवपाचो विचार चालू आसा. हे संबंदान संबंदीत अधिकारी ते सुवातेची पळोवणी करतले, अशें आमदार साळकार हांणी सांगलें.

7 न्हय, 6 दिसूच फेरी…

वास्को सप्ता उत्सवांतली फेरी सात दिसांची दवरपाचो निर्णय घेतिल्लो. ताका लागून ती फेरी 9 ऑगस्टाक काडपाचे आशिल्ले. मात 10 ऑगस्टाक पंचायत वेंचणूक आशिल्ल्यान पुलिसांक पंचायत वेंचणुकेच्या बंदोबस्ता खातीर तैनात करतले. ताका लागून ती फेरी 8 ऑगस्टाकूच काडपा संबंदांत यत्न सुरू आसात. फेरीच्या दिसां संबंदान पालिका निर्णय घेता. ताका लागून पालिका अधिकाऱ्यां कडेन चर्चा करतले, अशी म्हायती मेळ्ळ्या.