भांगरभूंय | प्रतिनिधी
भांगरभूंय । प्रतिनिधी
वास्कोः वास्को शारांत मुखेल सुवातांनी सीसीटीव्ही बसोवपाचो प्रस्ताव आपूण सरकाराक सादर करतलो. ह्यो सुवातो सोदून काडपाची सूचोवणी आपणे पुलीस खात्याक केल्या अशी म्हायती वास्कोचो आमदार कृष्णा साळकार हांणी सोमाराक दिली. पुलिसांनी सुवातो सोदून काडल्या उपरांत प्रस्ताव तयार करतलों अशें तांणी सांगलें.
बंदर आशिल्ल्या वास्को शारांत रेल्वेन हजारांनी लोक येतात. हेर राज्यांतल्यान गुन्यांव करून येवपी गुन्यांवकारांचो तातूंत आसपाव आसपाक शकता. गुन्यांवकारांचेर नदर दवोरपा खातीर सीसीटीव्हीचो उपेग जातलो. ते बसोवपाक कितलो खर्च येतलो, तशेंच ते खंय बसोवपाचो हाचो अदमास आशिल्लो प्रस्ताव तयार करपाक पुलीस खात्याक सांगलां. मुरगांव पालिका मंडळा कडेन ते संबंदी उलोवणी करपाक सांगलां अशें साळकार हांणी सांगलें.
सीटीटीव्ही बसोवपाक येवपी खर्चाचे पयशे खासदार निधींतल्यान, सरकारा कडल्यान वा वेपारी आस्थापनां कडल्यान सीएसआर वरवीं एकठांय करप शक्य आसा. पांच वर्सां देखभाल करपाचे अटीन ते बसोवपाचें काम दिवपाक जाता अशें तांणी सांगलें. वास्कोचो पुलीस निरीक्षक कपील नायक हांचे कडेन संपर्क सादलो तेन्नी सीसीटीव्ही बसोवपाचो प्रस्ताव आमी मुरगांव पालिका मंडळाक दिल्लो मात निधी नाशिल्ल्यान तांणी तो स्विकारलो ना अशें तांणी सांगलें. गुन्यांवगिरीचेर नदर दवोरपाक सीसीटीव्ही पुलिसांक सामके गरजेचे आसतात. ते बसोवपाच्यो शंबर सुवातो आमी सोदून काडिल्ले कडेन आसात. निधी उपलब्द नाशिल्ल्यान सीसीटीव्ही बसोवपाचें काम अजून जायना अशें नायक हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
