भांगरभूंय | प्रतिनिधी
वास्को : वास्को शारांत साबार वाठारांनी पडून आशिल्ल्यो कावलाक आयिल्ल्यो गाडयो काडपाची मोहीम वास्कोचे आमदार कृष्णा साळकार हांणी मुरगांव पालिकेच्या आदारान हातांत घेतल्या. बुधवारा 16 जुलयाक हे मोहिमेक सुरवात केली. संबंदीत गाडयेच्या धनयांनी आपलीं कावलाक आयिल्ल्यो गाडयो तत्काळ काडच्यो, अशें आमदार साळकार हांणी मागलां.
कावलाक आयिल्ली गाडी उखलून व्हेले उपरांत जर संबंदीत धनयाक ती जाय जाल्यार ताका दंड भरचो पडटलो. गाडयो सोडच्यो म्हूण आमदार, मंत्री हांचे फोन लेगीत आयल्यार त्यो सोडचे नात, अशी शिटकावणी नगराध्यक्ष गिरीश बोरकार हांणी ह्या वेळार दिली.
दोन अडेज वर्सां आदीं मुरगांवचे नगराध्यक्ष लियो रॉड्रिग्स हांणी शारांत विवीध वाठारांतनी दवरिल्ल्यो कावलाक आयिल्ल्यो गाडयो काडपाची मोहीम हातांत घेतिल्ली. त्या वेळार कावलाक आयिल्ल्यो सुमार 70 परस अदीक दुचाकी, मोटारी, ट्रक काडिल्ले. ताका लागून साबार वाठारांतल्यो सुवातो मेकळ्यो जाल्ल्यो. पूण आतां शाराच्या विवीध भागांनी परतून पडून आशिल्ल्यो कावलाक आयिल्ल्यो गाडयो वाडपाक लागल्यात. ह्या प्रकरणांत दखल घेतना आमदार साळकार हांणी वास्कोचे उपविभागीय पुलीस अधिकारी गुरुदास कदम आनी येरादारी पुलीस निरिक्षक आल्बिटो हांकां शारांत पडून आशिल्ल्यो कावलाक आयिल्ल्यो गाडयो काडपा संबंदांत सुचोवणी केल्ली. ते उपरांत सगले सोपल्कार पुराय केले उपरांत आतां रस्त्या कुशीच्यो कावलाक आयिल्ल्या गाडयो काडपाची मोहीम हातांत घेतल्या. हे खातीर लोकांनी समाधान उक्तायलां.
पुराय शारांत 100 ते 150 अश्यो कावलाक आयिल्ल्यो गाडयो आसपाची शक्यताय आसा. हेरांक आडखळ थारपी ह्यो गाडयो काडपाची गरज आसा. आमची ही मोहीम चालूच उरतली. शार नितळ दवरपाची जापसालदारकी फक्त आमदार, संबंदीत यंत्रणांची ना, ती दरेकल्याची आसा, अशें आमदार साळकार हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
