भांगरभूंय | प्रतिनिधी
वास्को : दिल्ली सावन रेल्वेंतल्यान वास्को चिकनाच्या नांवा खाला गोरवांच्यो जिबो धाडपाचो प्रकार बजरंग दलाच्या कार्यकर्त्यांक लागून आनी वास्को रेल्वे पुलिसांचे सतर्कतायेक लागून शेनवारा 29 मार्चाक उक्तडार आयलो. वट्ट 179 किलांचीं पार्सलां धाडिल्लीं. तीं वास्को पुलिसांनी जप्त केलीं. तशेंच पार्सलां व्हरपा खातीर आयिल्ले एके व्यक्तीक ताब्यांत घेतली. ह्या प्रकरणांत फुडली कारवाय करतले.
गोरवांच्या मासाची येरादारी आतां रेल्वेंतल्यान जाता हे खातीर रेल्वे विभागीय सल्लागार समितीचे वांगडा किरण नायक तशेंच बजरंग दलाच्या कार्यकर्त्यांनी अजाप उक्तायलां. दिल्लीच्या हजरत निजामुद्दीन रेल्वे स्टेशना वयल्यान वास्को रेल्वे स्टेशनार दोन पार्सलां धाडिल्लीं. तातूंत चिकन आशिल्ल्याचें सांगिल्लें. ताका लागून तीं पार्सलां थंय तपासूंक नात. पूण त्या पार्सलांतल्यान चिकना बदला गोरवांच्यो जिबो धाडटात अशी खबर बजरंग दलाच्या कार्यकर्त्यांक लागिल्ली. ते कार्यकर्ते फाटल्या कांय दिसां सावन सतर्क आशिल्ले.
ह्या प्रकरणांत वास्को पुलिशेक खबर कळटाच तांणी ह्या पार्सलां संबंदांत चवकशी सुरू केली. वास्को रेल्वे स्टेशनार तीं पार्सलां व्हरपाक आयिल्ले एके व्यक्तीक ताब्यांत घेतलो. ते उपरांत तीं पार्सलां उक्तीं केलीं तेन्ना तातूंत गोरवांच्यो जिबो सांपडल्यो. ह्या प्रकरणांत गोरवां सांबाळ आनी पशू वैजकी खात्याच्या गोरवांच्या दोतोराक आपयलो. तांणी त्या पार्सलांची तपासणी करून आपलो अहवाल दिलो.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
