भांगरभूंय | प्रतिनिधी
वास्को: शाराच्या विवीध सुवातींचेर आशिल्ल्यो कावलाक आयिल्ल्यो गाडयो काडपाची मोहीम आमदार कृष्णा साळकार हांणी मुरगांव पालिकेचे मजतीन हातांत घेतल्या. बुधवारा ही मोहीम सुरू करतना कांय दुचाकी काडल्यो. संबंदीत गाडयांच्या धनयांनी आपल्यो गाडयो बेगोबेग काडचीं असो उलो साळकर हांणी मारला. जाल्यार नगराध्यक्ष गिरिष बोरकार हांणी सांगलें, आमी गाडयो काडले उपरांत, संबंदीतांक त्यो जाय पडल्यार दंड भरचो पडटलो. गाडयो सोडच्यो म्हूण आमदार, मंत्री हांचे कितलेय फोन आयल्यार पसून आमी त्यो गाडयो कशेच फुकट दिवचे नात, असो दावो तांणी केलो.
दोन अडेज वर्सां आदीं नगराध्यक्ष लिओ रॉड्रिग्ज हांणी गाडयो काडपाची मोहीम हातांत घेतिल्ली. तेन्ना सुमार ७० परस चड दुचाकी, कार, ट्रक अश्यो गाडयो काडिल्ल्यो. हाका लागून जायत्यो सुवातो मेकळ्यो जाल्ल्यो. मात आतां शाराच्या विवीध भागांनी परत गाडयो वाडपाक लागल्यांत. हे संबंदी दखल घेतना आमदार साळकर हांणी उपविभागीय पुलीस अधिकारी गुरुदास कदम आनी येरादारी पुलीस निरीक्षक आल्बिटो हांकां त्यो गाडयो काडपा संबंदी सुचवण्यो केल्ल्यो. उपरांत सगळे सोपस्कार केले उपरांतूच आतां रस्त्या कुशीकच्यो गाडयो काडपाची मोहीम हातांत घेतल्या. हे विशीं नागरिकांनी समाधान उक्तायलें. स म्हयने, वर्सभर पसून कांय कडेन गाडयो उब्यो आसात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
