भांगरभूंय | प्रतिनिधी
वास्कोः शारांत चालू आशिल्ल्या फ्लायओव्हर कामाक लागून रस्त्यांची स्थिती दिसानदीस वायट जायत आसा. रस्त्यांचेर व्हड फोंडकुला आशिल्ल्यान प्रवासी बशी चलोवप धोक्याचे थारता. राष्ट्रीय महामार्ग प्राधिकरणाच्या कंत्राटदारान रस्त्यांची योग्य देखरेख करूंक नाशिल्ल्यान बस चालकांनी नाराजगी उक्तायल्या.
अशा रस्त्यांवेल्यान गाडी चलयतना खूब समस्या येतात. प्रवाशांक हाका लागून त्रास जाता आनी मागीर बस ड्रायव्हर आनी कंडक्टरां कडेन लोक वाद घालतात. शारांतल्या वाठारांनी सगळे बस ड्रायव्हर गती मर्यादेक पाळो दिवन बस चलयतात. पूण रस्त्यांचेर पडिल्ल्या फोंडकुलांक लागून येरादारी करपाक कठीण जाता अशें एका बस ड्रायव्हरान पत्रकारा कडेन उलयतना सांगलें.
मजगतीं, बस ड्रायव्हरांनी हें विशीं जायते फावट प्रशासना कडेन कागाळ केली. पूण कोणेंच कसलोच उपाय करूंक नाशिल्ल्यान ड्रायव्हरांनीच फुडाकार घेतलो आनी फोंडकुलां पुरयली. ह्या रस्त्यांचेर प्रवास करतना खूब त्रास जाता. पूण प्रवाशांची सुरक्षीतताय म्हत्वाची आशिल्ल्यान ही फोंडकुला भरपाचो आमीच फुडाकार घेतलो अशें आनीक एक ड्रायव्हरान सांगलें.
प्रशासन, कंत्राटदार आनी हेरांनी हातूंत लक्ष दिवन बेगोबेग रस्त्यांची दुरुस्ती करची आनी फ्लायओव्हराचें काम पुराय जायसर नेमान देखरेख करची, जाका लागून प्रवाशांचे आनी वाहन चालकांक जावपी त्रास उणें जातलें अशी मागणी लोकांनी केल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
