भांगरभूंय | प्रतिनिधी
-उदका पायपलायन बदलपाची मागणी
वास्कोः वास्को मांगोरहील मारुती मंदीर वाठारांतल्या गटार आनी जमनीपोंदा आशिल्ल्या गटारांतल्यान येवपी घाणयारे उदक घरांनी उदक वचपी नळाच्या पायपांनी मिक्स जाला आनी ते वाठारांत रावपी लोकांनी पियेल्ल्यान लोकांक ओंकारी आनी मोडशी जावपाक लागल्या. हे संबंदी थंळाव्यांनी उदका पायपलायन बदलपाची मागणी केल्या.
मारुती मंदीर वाठारांतल्या गटारांतल्यान कांय उदका पायपलायन गेल्यात. ह्यो उदका पायपलायनी सुमार पंचवीस वर्सां आदीं घातिल्ल्यो. त्यो आतां कळमेल्यात. देखून गटारांतल्यान येवपी घाणयारे उदक ह्या उदका पायपांनी मिक्स जाता. हाचे पयलींय अशें प्रकार घडिल्लें. त्या वेळार नगरसेवक नारायण बोरकारान थंय नवीन उदका पायपलायन घालपाचें काम स्वताच्या खर्चान केल्लें. पूण आतां दुसरे वटेनच्या उदकाच्या पायपांनी घाणयारे उदक मिक्स जाल्ल्याचे प्रकार घडपाक लागाल्यात. पयलीं नळाच्या उदकांत घाणयारे उदक मिक्स जाता हे थंयच्या लोकांक कळ्ळें ना. पूण जेन्ना उदकाक घाण वास येवपाक लागलो तेन्ना थंयच्या लोकां मदीं भिरांत पातळ्ळी. आनी तसलेंच उदक पियेल्ल्यान कांय लोकांक ओंकरी, मोडशी जावपाक लागली. ह्या प्रकरणाची म्हायती मेळटकूच नगरसेवक बोरकार हांणी थंय वचून पळोवणी केली. तशेंच उदकाची पायपलायन गटारांतल्यान, गटाराच्या कुशीकच्यान घालचे बदला त्यो योग्य सुवातेर, सुरक्षीत घालपाची गरज आसा. देखून घाणयारे उदक आनी उदकाचें पायपलायन संपर्कांत येवचे नात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
