भांगरभूंय | प्रतिनिधी
तीन मोटारी आनी तीन पेट्रॉल पंपांची तोडफोड
भांगरभूंय । प्रतिनिधी
मुरगांवः वास्कोच्या जोशी पेट्रॉल पंपा लागसार एका मनोरुग्ण मनशान गाडयांची तोडफोड करून उपरांत पेट्रॉल पंपाचेय मिटर फोडले. मनोरुग्णाक लोकांनी धरून बडयलो आनी उपरांत पुलिशेचे सुवादीन दिलो.
4 मार्चाक सकाळीं 10.30 वरांच्या सुमाराक जोशी पेट्रॉल पंपा लागसार एक मनीस हातांत बडी घेवन धांवत आयलो आनी थंय पार्क केल्ल्या मोटारींचे हारशे फोडपाक सुरवात केली. उपरांत ताणें जोशी पेट्रॉल पंपाचे दिशेन धांव मारून पेट्रॉल पंपाचे कांय मिटरांचें लुकसाण केलें. लोकांक हें कितें चल्लां तें कांयच कळ्ळें ना. ह्या वेळार पेट्रॉल पंपाचेर तीन बायलो कर्मचारी आनी एक दादलो कर्मचारी पेट्रॉल घालपाचें काम करताले. तो मनीस थंय धुमशेण कांडटा तें पळोवन ते कर्मचारी थंयच्यान पळून गेले. गाडयांनी पेट्रॉल घालपाक आयिल्लेय भियेवन पळून गेले.
मजगतीं, तो मनीस तोडफोड करता तें पळोवन कांय जाणांनी ताका ताब्यांत घेवन बरोच बडयलो आनी दोरयेन बांदून दवरलो. ते उपरांत पुलिसांक हे विशीं म्हायती दिली.
पुलिसांनी येवन त्या मनशाक ताब्यांत घेवन पुलीस स्टेशनाचेर व्हेलो आनी ताची चवकशी केली. त्या वेळार तो मनीस मनोरुग्ण आशिल्ल्याचें कळ्ळें. त्या मनशाच्या बापायन पुलीस स्टेशनाचेर येवन तो मनोरुग्ण आशिल्ल्याचें प्रमाणपत्र सादर केलें. पुराय चवकशी केले उपरांत ताका सोडलो. तो मनीस जोशी पेट्रॉल पंप वाठारांत रावता, अशें कळ्ळें. मनोरुग्ण मनशान तोडफोड केल्ल्यान तीन मोटारींचें तशेंच चार पेट्रॉल पंपांतल्या तीन पंपांचे मिटर फोडिल्ल्यान ते नादुरुस्त जाल्यात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
