भांगरभूंय | प्रतिनिधी
भांगरभूंय । प्रतिनिधी
वास्कोः मुरगांव पालिका मंडळान मंगळाक केल्ले एके धडक कारवायेंत वास्कोच्या भाजी मार्केटांत भाजी आनी फळ विक्रेत्यांनी रस्त्याचेर केल्लीं अतिक्रमणां काडून सुमार 30 हजार रुपयांचो माल जप्त केलो. जप्त केल्ली भाजी आनी फळां बोगमाळो हांगच्या ‘ओल्ड एज होम ‘ तशेंच सांकवाळच्या ल्हान भुरग्यांच्या बोर्डींगाक दिलो. माल काडून रस्तो मेकळो करपाक सांगून लेगीत भाजी- फळ विक्रेत्यांनी ताचे कडेन आडनदर केल्ल्यान पालिका मंडळाक ही कारवाय करची पडली. रस्तो मेकळो केल्ल्यान मार्केटांत येवपी लोकांनी नगराध्यक्ष आनी मुख्याधिकाऱ्याचे उपकार मानल्यात.
भाजी मार्केटांतल्या फळ- भाजी विक्रेत्यांनी आपापल्या दुकानां भायर रस्त्यार माल दवोरपाक सुरवात केल्यान गिरायकांक फिरपाक आडमेळे येताले. पालिका मंडळान ताची दखल घेवन विक्रेत्यांनी रस्त्याचेर माल दवोरचो न्हय अशी शिटकावणी दिल्ली. मात ते आयकनात हें पळोवन मंगळाराक नगराध्यक्ष लिओ रॉड्रिग्ज, उपनगराध्यक्ष अमय चोपडेकार, लेखा प्रशासकीय अधिकारी उदय वाडकार, पालिका निरीक्षक विभव फळदेसाय, भाजी मार्केट वेवस्थापन समिती अध्यक्ष विनोद किनळेकार, वास्कोचो पुलीस उप निरीक्षक मयुर सावंत हांणी अतिक्रमणा काडून उडोवपाची कारवाय केली. रस्त्याचेर बसून विक्री करताले तांचोय माल जप्त केलो.
रस्त्याचेर केल्लीं अतिक्रमणां काडून उडोवपाची कारवाय हाचे फुडेंय करतले अशें नगराध्यक्ष लिओ रॉड्रिग्ज हांणी सांगलें. भाजी आनी फळ विक्रेत्यांनी आपलो वेवसाय दुकानांतल्यान केल्यार ताचो फायदो गिरायकां वांगडा तांकाय जातलो. मार्केटांतल्या रस्त्यार आपलो माल दवोरपाची तांकां संवकळ जाल्या. ही मनमानी आतां सोसून घेवचे नात अशेंय तांणी सांगलें. भाजी आनी फळ विक्रेत्यांनी तांका दिल्ले सुवातेंतल्यान माल विक्री करपाक जाय. आपली मर्यादा हुपल्यार ताचो त्रास मार्केटांत येवपी लोकांक जाता हें तांणी समजून घेवपाक जाय अशें मार्केट समितीचो अध्यक्ष नगरसेवक विनोद किनळेकारान सांगलें. रस्त्याचेर माल दवोरिल्लो हाचे फुडें दिसल्यार विक्रेत्यांचेर खर कारवाय करपाची शिटकावणी तांणी दिल्या.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
