भांगरभूंय | प्रतिनिधी
उच्च न्यायालयाच्या आदेशा वयल्यान कारवाय
भांगरभूंय । प्रतिनिधी
मुरगांवः ओरुले वास्को वाठारांतलें बेकायदो बांदकाम पालिके वतीन मोडलें. देड वर्सा सावन हें प्रकरण उच्च न्यायालयांत आशिल्लें. 22 डिसेंबराक उच्च न्यायालयाच्या आदेशा प्रमाण त्या बांदकामाचेर कारवाय केली.
वास्को शारांत तशेंच हेर वाठारांनी बेकायदो बांदकामांक ओतो आयला. संबंदितांचें हाचेर नियंत्रण ना. कोणे एकल्यान ह्या बेकायदो बांदकामा आड आवाज काडले उपरांत धांवपळ सुरू जाता आनी कारवाय करतात. असोच प्रकार ओरुले वास्को वाठारांत जालो. जितेंद्र बोरकार हांणी केल्ल्या बेकायदो बांदकामाचेर न्यायालयाच्या आदेशा प्रमाण पालिके वतीन कारवाय केली.
ते सुवातेचेर रस्त्या कुशीक अतिक्रमण करून जितेंद्र बोरकार हांणी राखणे वणत बांदिल्ली. हे विशीं पालिकेंत कागाळ दाखल केल्ली. अखेर हें प्रकरण उच्च न्यायालयांत पाविल्लें.
हें बेकायदो बांदकाम मोडटना मुरगांवचे मामलेदार रणजीत साळगांवकार, पालिका अभियंते आगुस्तीन मिस्किता, अनुरुद्ध पवार, विपूल तशेंच पालिका कर्मचारी, वीज खात्याचे कर्मचारी, भौशीक बांदकाम खात्याचे कर्मचारी हाजीर आशिल्ले. कारवाये वेळार कसलीच आडखळ येवची न्हय हे खातीर पुलीस तैनात दवरिल्ले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
