भांगरभूंय | प्रतिनिधी
मुरगांवः उणे जाडायेच्या प्लास्टीक पोतयांचेर बंदी घातिल्ली आसतनाय वास्को मार्केटांत ह्या पोतयांचो बिनधास्त वापर जातना दिसता. प्लास्टीक पोतयांचो वापर करप्यां आड कारवाय करचे खातीर मुरगांव पालिकेन पालिका निरिक्षकाची खाशेली नेमणूक केल्या. पूण ह्या निरिक्षकान आतां मेरेन कितल्या जाणां आड कारवाय केल्या हो संसोधनाचो विशय जावपाक शकता. प्लास्टीक पोतयांचो वापर करचो न्हय हे खातीर आमी रोखडीच जागृती मोहीम आनी कपड्यांच्यो पोतयो वाटपाचें काम हातांत घेतले, अशें नगराध्यक्ष लियो रॉड्रिग्स हांणी जाहीर केल्लें. पूण तांची जागृती मोहीम अजून सुरू जावंक ना. उणे जाडायेच्यो प्लास्टीक पोतयो वापरच्यो न्हय हे खातीर उपाय येवजण करतले, अशें मुरगांव पालिके वतीन सदांच सांगतात. पूण संबंदितांच्या विधानां कडेन कोणूच गंभीरतायेन लक्ष दिनात. बाजारांतूय उण्या जाडायेच्या प्लास्टीक पोतयांचो बिनधास्त तरेन वापर जाता. हाचे वयल्यान मुरगांव पालिकेच्या अधिकाऱ्यांचो तांकां मातूय भंय दिसना हें स्पश्ट जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
