भांगरभूंय | प्रतिनिधी
वास्कोः वास्को पोरण्या बसस्टॅण्डा वयले येरादारी वेवस्थेचे बारा बिरेस्तार तेरा शुक्रार जाल्यात. ताका लागून हेर वाहन चालकांक खूब त्रास सोंसचो पडटा. थंयची येरादारी वेवस्ता सुरळीत जावची हे खातीर येरादारी पुलीस विभाग, येरादारी विभाग आडनदर करता, अशें वाहन चालकांचें म्हणणें आसा.
पोरण्या बसस्टॅण्डार आदीं कदंब शटल सर्वीस बस आनी भितरल्या रस्त्याचेर तशेंच मडगांवां बी वचपा खातीर खाजगी मिनीबशी पार्क करताले. उपरांत कुन्हा चौकांत कदंब शटल सर्वीस बस बूथ व्हेलो. ताका लागून खाजगी मिनी बस चालकांक बसस्टॅण्डा वयली सगळी सुवात मेळ्ळी. मात ताका लागून येरादारी वेवस्थेंत शिस्त येवचे बदला बेशिस्तपणां चडूच वाडली. ड्रायव्हर, कंडक्टर आनी येरादारी पुलीस हे गजालीक जापसालदार आसात.
आदीं सिने वास्को लागसार येरादारी पुलीस उबो रावून येरादारी वेवस्थेचेर नदर दवरतालो. मिनी बस चालकांनी वाकड्यो- तिकड्यो बशी उब्यो करून हेर गाडयांक आडखळ केली जाल्यार तो बसचालकांक शिटकावणी दितालो. पूण आतां थंय येरादारी पुलीस वखदाक लेगीत दिसना. हेच खातीर बेशिस्तपणां करपी बस चालकांचेर कारवाय जायना. ह्या बसस्टॅण्डाच्या रस्त्याचेर एके वटेन बशी जाल्यार दुसरे वटेन दुचाकी पार्क करतात. थंय एका फाटल्यान एक बशी उब्यो करचे बदला खूब खेपे दोन रांकांनी आडव्यो- तिडव्यो बशी उब्यो दवरतात. जाल्यार कांय वेळार उब्यो दवरिल्ल्या दुचाकी फाटल्यान कांय जाण आपल्यो दुचाकी आडव्यो पार्क करतात. ताका लागून आदीं दुचाकी पार्क केल्ल्यांक आपली दुचाकी भायर काडटना त्रास जाता. कांय बस चालक आनी दुचाकी चालक हांच्या बेशिस्तपणाक लागून ह्या रस्त्याचेर गाडयांची सदांच कोंयडी जाल्ली दिश्टी पडटा. गाडयो मुखार सरच्यो हे खातीर व्हडा- व्हडान हॉर्न मारप चालू जाता. ताका लागून आशिकुशीच्या विक्रेत्यांक आनी लोकांक त्रास सोंसचो पडटा. कांय वेळार वादावादी लेगीत जाता.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
