भांगरभूंय | प्रतिनिधी
थळाव्या लोकांचो येवकार; तरणाट्यांची धांवपळ
वास्को: तीन पुलिसांक मारपेट जाले उपरांत वास्को पुलिसांनी खरपणान कारवाय सुरू केल्या. फाटल्या दोन दिसांत वास्को पुलिसांनी वास्को पुलीस शिमेंतल्या वाठारांनी गस्त घालपाक सुरवात केल्ल्यान रातच्या वेळार भोंवपी तरणाट्यांची धांवपळ जाल्या. थळाव्या लोकांनी पुलिसांचे कारवायेक येवकार दिला. मजगतीं, ही कारवाय फक्त कांय दिसां पुरतीच उरची न्हय अशी थळाव्या लोकांनी उक्तायल्या.
19 तारखेक मध्यान रातीं सवायतीन वरांच्या सुमाराक मांगोरहील वाठारांतल्या सात तरणाट्यांनी पुलीस वाहन चालकां सयत दोन कॉन्स्टेबलांक मारपेट केल्ली. हे खातीर पुलिसांची सुरक्षा चर्चेत आयिल्ली. ह्या प्रकरणांत काँग्रेसीन आवाज काडिल्लो. जाल्यार वास्कोचे आमदार कृष्णा साळकार हांणी पुलिसांक संबंदितां आड आनी समाजविद्वाट्यां आड कारवाय करपा खातीर मेकळीक दिल्ल्याचें सांगलें.
वास्कोचे उपअधिक्षक गुरुदास कदम हांणीय गुंड आनी समाजविद्वाटे हांकां सोडचे नात अशी शिटकावणी दिल्ली. उपरांत वास्को पुलीस अॅक्शन मोडार आयले.
वास्को पुलीस निरिक्षक वैभव नायक हांच्या फुडारपणा खाला पुलिसांनी विवीध सुवातांनी गस्त घालपाक सुरवात केल्या. जे कारणां बगर रस्त्यार उबे रावतात, वाहनां वयल्यान भोंवतात तांची चवकशी सुरू केल्ल्यान तांची धांवपळ जाल्या. रातच्या वेळार बंद दुकानांच्या सोंपणांचेर बसपी तरणाट्यांक धांवडावन घालतात. ताका लागून सद्या रस्त्यार सामसूम दिसून येता. रातीं उसरां मेरेन गाडे उक्ते दवरप्यांचीय चवकशी करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
