भांगरभूंय | प्रतिनिधी
पणजी: घुवळे वखदां तस्करी आडचे एके व्हड कारवायेंत, वास्को पुलिसांनी बिगर गोंयकार घुवळे वखदां तस्करी टोळयेक उक्तडार हाडल्या. हे टोळयेच्या मुखेल गांजो पुरवण करतल्याक ओडिशा हांगच्यान अटक केली. हे कारवायेची सुरवात १८ सप्टेंबराक जाली. पुलिसांनी ५.३४ किलो गांजो जप्त करून तीन दुबावितांक अटक केली. हातूंत दिनेश चौहान (२५, रा. वाडे, मुरगांव), तशेंच ओडिशाचो गंजाम जिल्ह्यांतलो सप्नेश्वर गौडा (२५) आनी नीलांचल गौडा (२१) हांचो आसपाव आसा.
हे विशीं चड म्हायती प्रमाण, तपास अधिकार्यांक हे टोळयेच्या मुखेल पुरवण करप्याची म्हत्वाची म्हायती मेळ्ळी. उपरांत दक्षीण गोंयचेे पुलीस अधीक्षक टिकम सिंह वर्मा हांच्या वट्ट देखरेखी खाला आनी वास्को पुलीस स्टेशनाचे पुलीस निरीक्षक वैभव नायक हांच्या नेतृत्वा खाला एक विशेश पंगड तयार केलो. हो पंगड रोखडोच ओडीशाक गेलो. थंय सोडिशा पुलिसांच्या समन्वयान आने तांत्रिक पाळत दवरून तांणी मुखेल आरोपी हद्दु भंडारीक अटक केली.
हद्दु भंडारी हो हे बिगर गोंयकारांचे टोळयेचो मुखेल पुरवणदार आशिल्ल्याचें मुखार आयलें. हे कारवायेक लागून घुवळे वखदांच्या बिगर गोंयकारांचे टोळयेक व्हड धक्को बसला. पुलीस हे विशीं मुखार तपास करतात.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
