भांगरभूंय | प्रतिनिधी
दुचाकी आदल्या आमदाराच्या घरकान्नीची
वास्को: वास्कोचे आदले आमदार कार्लुस आल्मेदा हांची घरकान्न जेनिफर हांच्या दुचाकी चोरी प्रकरणांत वास्को पुलिसांनी सड्या वेलो खांपो चोर विनायक राणे (21) हाका अटक केली. ताका न्यायालयांत उबो केलो तेन्ना चौदा दीस न्यायालयीन कोठी दिवपाचो आदेश न्यायाधिशांनी दिलो.
कार्लुस आल्मेदा हे एका हावसींग सोसायटींत रावतात. तांच्या पुतान 30 जून दिसा दुचाकी सोसायटीचे पार्कींग सुवातेंत दवरिल्ली. एक जुलय दिसा तांचो पूत पार्कींग सुवातेर आयलो तेन्ना ताका दुचाकी दिसली ना. सदर दुचाकी चोरयेक गेल्ल्या प्रकरणांत वास्को पुलिशेंत कागाळ केली.
दोन जुलयाक वास्को पुलीस स्टेशनाचेर हवालदार संतोष भाटकार, पुरुषोत्तम नायक हे दोगूय सांजवेळा गस्तीर आसतना बायणांतल्या एमपीटी मैदाना कुशीक पावले. थंय तांकां एक तरणाटो दुचाकीन वतना दिसलो. ते दुचाकीक मुखार आनी फाटल्यान नंबर प्लेट नाशिल्ल्यान तांणी ताका आडायलो. ताचे कडेन चवकशी केली तेन्ना ताणें सारक्यो जापो दिल्यो नात.
तो तरणाटो हाचे पयलीं कांय चोरी प्रकरणांत आशिल्ल्यान पुलिसांक ताचो दुबाव आयलो. ताका पुलीस स्टेशनार हाडले उपरांत त्या दुचाकीची योग्य तरेन तपासणी केली तेन्ना ती दुचाकी चोरयेची आशिल्ल्याचें उक्तें जालें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
