भांगरभूंय | प्रतिनिधी
वास्को, प्रतिनिधी ः वास्कोच्या संडे बाजारांतल्या तीन दुकानांक उजो लागून धा ते बारा लाख रुपयांचें लुकसाण जाले. वास्कोचे आमदार कृष्णा साळकार हांणी घडणुक सुवातेक भेट दिवन पळोवणी केली. संबंदीतांक मुख्यमंत्री निधींतल्यान अर्थीक मजत मेळटली अशें आश्वासन तांणी दिलें. मजगतीं, शार्ट सर्किटाक लागून हो उजो लागला आसूं येता असो अदमास आसा.
संडे बाजारांतल्या कांय दुकानांतल्यान रातीं धुंवर येता तें पळोवन कोणें तरी पुलिसांक, उजो पालोवपी दळाक, वीज खात्याक म्हायती दिली. ही म्हायती मेळटाच वास्को उजो पालोवपी दळ थंय पावलो. तांणी उजो नियंत्रणांत हाडलो. ताका लागून व्हड दुर्घटना टळली.
ह्या उज्यांत रफीक, दीपक मिश्रा आनी रेश्मा हांच्या दुकांनातले सामान जळ्ळें. जाल्यार समैरुद्दीनाच्या दुकानांत कांय प्रमाणांत उजो लागलो आनी ताका लागून ताच्या दुकानांतले कपडे जळ्ळे. रफीकाचे सगळ्यांत चड लुकसाण जालें. ताणें दोन दिसां आदीं व्हड प्रमाणांत रेडिमेड कपडे विकपाक हाडिल्ले. ह्या उज्यांत ते सगळे जळ्ळे. सुमार पांच लाख रुपयांचें लुकसाण जालां अशें तांणा सांगलें. ताच्या दुकाना लागीं चप्पल आनी बुटाचे दीपक मिश्रा हांचे दुकान आसा. हांतूत तांचेय सगळे सामान जळ्ळें. रेश्मा हांच्या दुकानांतले कपडे जळ्ळे. ह्या घडणुकीत सुमार धा ते बारा लाख रुपयांचें लुकसाण जाल्ल्याचो अदमास आसा.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
