भांगरभूंय | प्रतिनिधी
मुरगांव : वास्को शारांत दुचाकी, चारचाकी ड्रायव्हर येरादारीचे सगले नेम मोडून मेळत थंय गाडयो पार्क करून दवरतना दिसतात. हे विशीं संबंदीत विभाग आडनदर करता अशें थळाव्या नागरिकांनी सांगलें.
वास्कोचो स्वतंत्र पथ आनी एफएल गोम्स मार्ग, दत्तात्रेय मार्गा वांगडा हेर भितरल्या रस्त्यावेले ड्रायव्हर येरादारी नेम पाळिनात. वास्कोच्या स्वतंत्र मार्गार एके वटेन दुचाकी आनी दुसरे वटेन चारचाकी गाडयो पार्क करपाची वेवस्था केल्या तरीय कोण नेम पाळिनात. दुचाकी गाडी पार्किंगांत चारचाकी जाल्यार चारचाकी पार्किंगांत दुचाकी पार्क केल्ली सदांच दिसता. येरादारी विभाग मात हांगां नदर दवरीनासतना हेर सगळ्याक चड लक्ष दवरता. हाका लागून वास्को शारांत पार्कींग वेवस्था पुरायेन हाल्ल्या.
वास्को शारांतल्या सगळ्या रस्त्यांच्या कुशीक पार्कींग तकटो मुरगांव पालिकेन उबारल्यात. तरीय जायते ड्रायव्हर मनाक येता तशें वागतात. शारांत सुवात आसा थंय गाडयो पार्क करतात. हाका लागून नेम पाळपी ड्रायव्हरांक गाडयो पार्क करपा खातीर सुवात मेळप कठीण जाता. येरादारी विभाग शारांतले पार्कींग वेवस्थे विशीं गंभीर नाशिल्ल्यान हे घडटा. हे विशीं येरादारी पुलिसांनी पावल उबारपाची गरज आसा, अशें मत नागरिकांनी उक्तायलां.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
