भांगरभूंय | प्रतिनिधी
लोकांचें लायटीचेर चलपी उपकरणांचें लुकसाण
भांगरभूंय । प्रतिनिधी
वास्कोः मांगोरहिलच्या अमन विव्हेंडा इमारतीचे आगाशेक मंगळारा 8 ऑक्टोबराक जोगूल घसटून गेल्ल्यान इमारतीचे आगाशीचें कांय प्रमाणार लुकसाण जालें. तशेंच लिफ्ट, जनरेटर हांचे सयत कांय लोकांची लायटी वयलीं उपकरणां, टीव्ही, इन्व्हर्टर, पंखे हांचें लुकसाण जालें.
मंगळारा सांजेच्या आदेसाक नेटाचो वारो, जोगलां आनी गडगड मारून पावसाक सुरवात जाली. ताचो परिणाम लोकजिणेचेर जालो. मांगोरहील वाठारांतल्या मांगोर स्पोर्ट्स क्लबा मुखार व्हड जगलावणी जावन थंयच्या अमन विव्हेंडा हे भोवमाळ्यांचे इमारतीचेर आगाशीच्या एका कोनश्याक जोगूल घसटून कोसळ्ळें. ताका लागून आगाशीचें सिमेंट, चिरें मोडून ती खाला कोसळ्ळी. जोगूल पडटना एका झाडाक घसटून गेल्ल्यान तें झाडूय थंय पार्क केल्ले मोटारीचेर पडलें. हातूंत मोटारीचें लुकसाण जालें. जोगूल आगाशेक घसटून गेले उपरांत थंय व्हड आवाज जालो. इमारतीच्या लागसारचे लोक भियेले. इमारतीच्या तळमाळ्यार आशिल्ले दुकानकार लेगीत भियेले. खंय कितें जालां, तें तांकां कांयच कळ्ळें ना. कांय वेळा उपरांत तांकां थंयची परिस्थिती कळ्ळी. बुधवारा सकाळीं आमदार कृष्णा साळकार हांणी नगराध्यक्ष गिरीष बोरकार, मामलेदार प्रवीणजय पंडीत, तलाठी गौतम साळुंखे आनी हेरां सयत थंय भेट दिवन पळोवणी केली. ह्या प्रकरणांत लुकसाणेचो अहवाल तयार करून तो जिल्होधिकारी कार्यालयाक दितले, अशें मामलेदार पंडीत हांणी सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
