भांगरभूंय | प्रतिनिधी
वोल्त आशिल्लो भारतांतलो पयलो केबल उड्डाण पूल
भांगरभूंय । प्रतिनिधी
मुरगांवः मुरगांव बंदराक जोडपी तशेंच वास्को शार ते राष्ट्रीय म्हामार्गा वयल्या उड्डाण पुलाचेर वचपी अपर रॅम्पाचें उक्तावण मंगळारा 21 जानेवारीक केंद्रीय रस्ते आनी येरादारी तशेंच म्हामार्ग मंत्री नितीन गडकरी हांचे हाजिरेंत जातलें. देशांतलो एकसुरो वोल्त आशिल्ल्या केबल उड्डाण पूल मुरगांव बंदरांत उबारला, अशी म्हायती मुरगांवचे आमदार संकल्प आमोणकार हांणी दिली.
वेर्णे ते मुरगांव बंदराक जोडपी 566 म्हामार्ग पुराय जाला. 644 कोटी रुपया खर्च करून बांदिल्ल्या म्हामार्गाचें मंगळारा व्हड कार्यावळी वरवीं लोकार्पण करतले. सोमारा 20 जानेवारीक आमदार संकल्प आमोणकार हांणी राष्ट्रीय म्हामार्गाचे प्रकल्प वेवस्थापक सी व्ही पी फुर्तादो, मुरगांवचे उपजिल्होधिकारी भगवंत करमली, मुरगांवचे पुलीस उपअधिक्षक गुरुदास कदम, गॅमन इंडियाचे वेवस्थापक दीपक बांदेकार, प्रबाकरण, एमपीएचे सचीव शंकरा बाबू, मुख्य अभियंतो सुदिन प्रभुदेसाय, वास्को येरादारी पुलीस निरिक्षक शैलेश नार्वेंकार, प्रभारी मुरगांव पुलीस स्टेशनाचे निरिक्षक आनंद शिरोडकार, एमपीएची जनसंपर्क अधिकारी तरन्नूम हवालदार, शैलेंद्र चोपडेंकार आनी हेर पदाधिकारी हाजीर आशिल्ले.
आमदार आमोणकार हांणी सांगलें, 23 वर्सां उपरांत अखेर वेर्णा ते मुरगांव बंदराक जोडपी राष्ट्रीय म्हामार्ग पुराय जाला. हाचें सगळें स्रय केंद्रीय रस्तो येरादारी तशें म्हामार्ग मंत्री नितीन गडकरी आनी राज्य सरकाराक वता, अशी म्हायती तांणी दिली.
वास्को रवीन्द्र भवना कडल्यान वचपी उड्डाण पूल मुरगांव बंदरांतच केबल उड्डाण पुला वरवीं व्हेला. हे मुखार अवजड गाडयो ह्या म्हामार्गाचो उपेग बंदरांत वचपा खातीर करतल्यो. हे खातीर मुरगांवांत जावपी प्रदुशण उणें जातलें. तशेंच मुरगांव बंदरांत कोळसो प्रदुशण उणें करचे खातीर डोन उबारपाचें काम निमाण्या पांवड्यार पावलां. हाका लागू सडा, जेटी, बोगदा, रुमडावाडो आनी हेर वाठारांनी जावपी प्रदुशण नियंत्रणांत येतलें, अशें आमदार आमोणकार हांणी सांगलें. मुरगांव बंदरांतलो केबल स्टेड पूल पुराय जावचे खातीर केंद्रीय मंत्री गडकरी हांचे वांगडाच मुख्यमंत्री डॉ. प्रमोद सावंत हांकां वता, अशेंय तांणी सांगलें. मंगळारा सांजेच्या 5 वरांचेर लोकार्पण सुवाळो जातलो. ह्या वेळार केंद्रीय मंत्री नितीन गडकरी, बोट आनी बंदर मंत्री सर्वानंदा सोनिवाल, मुख्यमंत्री डॉ. प्रमोद सावंत, केंद्रीय मंत्री श्रीपाद नायक, येरादारी मंत्री मॉवीन गुदिन्हो, भाजप प्रदेशाध्यक्ष दामू नायक, राज्यसभा खासदार सदानंद शेट तानावडे, मुरगांवचे आमदार संकल्प आमोणकार, वास्कोचे आमदार कृष्णा साळकार, नगराध्यक्ष गिरीश बोरकार, एमपीएचे अध्यक्ष एन विनोद कुमार आनी हेर पदाधिकारी हाजीर रावतले.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
