भांगरभूंय | प्रतिनिधी
भांगरभूंय । प्रतिनिधी
वास्कोः रेल्वे दुपदरीकरण कामाक लागून वास्को हांगचें कब्रस्तानाचेर परिणाम जावपाची शक्यताय आशिल्ल्यान पंचायत मंत्री माविन गुदिन्हो आनी वास्कोचो आमदार कृष्णा साळकार हांणी रेल्वे अधिकारी आनी मुस्लिम फुडाऱ्यांची जोड बसका घेवन व्हो प्रश्न सुटावो करपाचें यत्न केलें.
रेल्वे दुपदरीकरणाक लागून कब्रस्तानांतल्या थडग्यांची नासधूस जातली अशी भिरांत मुसलमानांक आसा. तांणी माविन गुदिन्हो आनी साळकार हांच्या सामकार हो प्रश्न मांडून ताचेर उपाय येवजण करपाची विनवणी तांकां केल्ली. जोड बसके उपरांत पत्रकारां कडेन उलयतना थडग्यांक हात लायनास्तना रेल्वे दुपदरीकरणाचें काम करपाची उपाय येवजण तयार केल्या अशें गुदिन्हो हाणे सांगलें. ही येवजण सगळे मानून घेतले आनी रेल्वेक कब्रस्ताना कडली 10 मीटर सुवात दिवचे नात. रेल्वेन आपले हद्दींत दुपदरीकरणाचें काम करचें अशें थारायलां अशें ताणे सांगलां. मुसलमानांची धर्मिक भावना दुखोवपाक दिवचे नात अशें साळकार हाणे सांगलें.
जे जमनीचो सद्या प्रश्न आसा ती कब्रस्ताना खातीर दिल्या. आनी तिचेर रेल्वेन अतिक्रमण करपाक जायना अशें सरकारान तांका सांगचें अशें आपणे सरकाराक सांगलां अशी म्हायती साळकारान दिली. सद्याच्या रेल्वे मार्गा कुशीक आशिल्ल्या कब्रस्तानाक कसलोच धोको उप्रासचो ना अशेंय ताणे सांगलें.
खिणाखिणाक ताज्यो घडणुको आनी तुमचे कडेन संबंदीत दरेक खबर मेळयात एका क्लिकाचेर! फेसबूक, ट्विटराचेर आमकां फॉलो करात आनी व्हाट्सएप सबस्क्रायब करपाक विसरूं नाकात.
